LAÇIN RAYON İCRA HAKİMİYYƏTİNİN BAŞÇISI ELBRUS TƏHMƏZOVUN ÇIXIŞI
-Möhtərəm cənab Prezident!
İşğaldan əvvəl 124 kənddə, 1 qəsəbə və 1 şəhərdə yaşayan, hazırda respublikanın 59 rayonunda müvəqqəti məskunlaşan 68 min nəfərdən çox laçınlı bu gün dövlətə və dövlətçiliyə sadiq olduqlarını əməli işləri ilə sübut etməkdədirlər.
Bütün qaçqın və məcburi köçkünlər kimi, laçınlılar da xalqımızın ümummilli lideri Heydər Əliyevin respublikamıza rəhbərlik etdiyi dövrdə daim onun diqqət və qayğısından bəhrələnmiş və bu gün də Sizin diqqət və qayğınızdan bəhrələnməkdədirlər.
2005-ci ilin iyunun 21-də keçirilən müşavirədə verdiyiniz göstərişə əsasən, Qarqarçayda qısa müddətdə bənd tikilərək, 8,1 kilometr uzunluğunda beton üzlüklü kanal çəkildi. Nəticədə əhalimizin uzun illərdən bəri ürəklərində bəslədikləri arzuları həyata keçdi, məhsul istehsalı 2 dəfə artdı. Laçınlılar bütün bunları Sizin onlara göstərdiyiniz diqqət və qayğının nəticəsi kimi qiymətləndirərək, kanala “Qayğı” adı vermişlər. Bölgəyə növbəti səfəriniz zamanı rayon ictimaiyyəti həmin kanal üzərində Sizinlə görüşü böyük səbirsizliklə gözləyir.
Ötən müşavirədən sonra Bərdə, Ağcabədi, Saatlı və Sabirabad rayonları ərazisindəki çadır düşərgələrində və vaqonlarda məskunlaşan məcburi köçkünlər üçün Taxtakörpü ərazisində 58 evdən ibarət, bütün sosial infrastruktura malik 2 yeni qəsəbə tikilərək istifadəyə verilmişdir.
Rayonun bütün dövlət strukturlarının fəaliyyət göstərdiyi Taxtakörpü qəsəbəsində 2006-cı ildə rabitə evi tikilərək, 500 nömrə tutumlu elektron ATS quraşdırılmış, ərazidə 3 məktəb tikilmiş, 5 məktəb binası əsaslı təmir olunmuşdur. Bundan əlavə, yeni iş yerləri yaratmaq məqsədi ilə ərazidə ticarət, ictimai iaşə, məişət obyektləri və emal sexləri inşa olunaraq, məcburi köçkünlərin istifadəsinə verilmişdir.
Ayrı-ayrı şəhər və rayonlardakı 49 yaşayış məntəqəsində Dövlətqaçqınkomun və Məcburi Köçkünlərin Sosial İnkişaf Fondunun yaxından köməyi ilə içməli su, elektrik təchizatı, yol çəkilişi, yaşayış binalarında mühəndis-kommunikasiya qurğularının bərpası ilə bağlı müxtəlif layihələr həyata keçirilmişdir.
Cari ildə Taxtakörpü qəsəbəsində inzibati bina, 350 yerlik mədəniyyət evi inşa olunmuş, yeni xəstəxana-poliklinika kompleksi, Suvarma sistemləri idarəsi, yol istismar sahəsi, yeni yaradılan “Aqroservis”, təmir-tikinti müəssisələri, su-kanal idarəsi üçün binalar və iş həyətləri tikilmişdir. Qəsəbənin küçə və meydanlarına asfalt döşənmiş, ərazidə 9 kilometr çınqıl örtüklü yol, 4 kilometr elektrik hava xətti, 6 kilometrlik içməli su xətti çəkilmiş, 20 min ədəd ağac və gül kolları əkilmişdir. Dairə seçki komissiyası və Yeni Azərbaycan Partiyasının Laçın rayon təşkilatı üçün binalar inşa edilmişdir.
Hörmətli cənab Prezident!
Bütün bunlarla yanaşı, icazənizlə, rayonun idarə olunması və məcburi köçkünlərə göstərilən xidmətlərin daha da yaxşılaşdırılması ilə bağlı bəzi fikirlərimi də söyləmək istərdim.
Taxtakörpü adlandırdığımız ərazidə yeraltı qazmalarda və qamış damlarda ağır şəraitdə məskunlaşan 3400 ailəyə yaşayış evləri, təhsil, səhiyyə və mədəniyyət müəssisələrinin tikilməsi, bərk və çınqıl örtüklü yolların çəkilməsi, 1970-ci illərdən istismar olunaraq sıradan çıxan bütün elektrik sistemlərinin dəyişdirilməsi ilə bağlı ərazinin sosial-iqtisadi problemlərinə yenidən baxılması məqsədəuyğun olardı.
Taxtakörpü qəsəbəsindən 15 kilometr məsafədə olan Ağcabədi, 320 kilometr məsafədə olan Bakı şəhərinin Xətai və Səbail filialları vasitəsilə bank əməliyyatları aparmağa fiziki imkanlarımız da çatmır. Odur ki, 1998-ci ildə fəaliyyəti dayandırılan “Kapitalbank”ın Laçın rayon filialının Taxtakörpü qəsəbəsində bərpa olunmasına ciddi ehtiyac vardır.
Möhtərəm cənab Prezident!
Laçınlılar inanırlar ki, işğal olunmuş torpaqlarımız Sizin apardığınız qətiyyətli siyasət və gördüyünüz məqsədyönlü tədbirlər nəticəsində azad ediləcək, hamı kimi, biz də öz doğma yurdlarımıza qayıdacağıq.
Sizi əmin edirəm ki, apardığınız daxili və xarici siyasəti ürəkdən bəyənən laçınlılar bundan sonra da bütün sahələrdə sağlam mövqe nümayiş etdirəcək, ulu öndərimiz Heydər Əliyevin müdrik siyasi xəttinin ən layiqli davamçısı kimi Sizin ətrafınızda daha sıx birləşəcək və ən fəal yardımçınız olacaqlar.
X X X
Azərbaycan Prezidenti İlham Əliyev müşavirəyə yekun vurdu.
Bölmənin digər xəbərləri
