Lənkəran Dövlət Dram Teatrı gənc rejissorlar üçün müsabiqə elan edib
Lənkəran, 11 may, Bağır Əliyev, AZƏRTAC
Lənkəran Dövlət Dram Teatrı müsabiqə yolu ilə rejissorları əməkdaşlığa dəvət edir.
Bu barədə AZƏRTAC-ın bölgə müxbirinə teatrın direktoru Tofiq Heydərov məlumat verib. Onun sözlərinə görə, müsabiqənin keçirilməsində məqsəd koronavirus (COVID-19) pandemiyası bitdikdən sonra, sənətsevərlərin əhval-ruhiyyəsinə müsbət təsir edən, müasir dövrün tələblərinə cavab verən komediya janrında yazılmış əsəri tamaşaya hazırlamaqdır.
Müsabiqədə əsasən, gənc rejissorların iştirakı nəzərdə tutulub. Təqdim olunan əsərlərin eksplikasiyası daha çox maraq kəsb edən rejissora üstünlük veriləcək, ona qarşılıqlı razılışma yolu ilə qonorar ödəniləcək.
T.Heydərov bildirib ki, dramaturji material və eksplikasiya 1 avqust 2020-ci ilə kimi təqdim olunmalıdır. Tamaşanın hazırlıq prosesi isə cari ilin dördüncü rübü üçün nəzərdə tutulub.
Əlavə məlumat üçün [email protected] e-mail ünvanına, eləcə də (02525) 54973 və (050) 3771924 (mobil) telefon nömrələrinə müraciət etmək olar.
Bölmənin digər xəbərləri
