LƏNKƏRANDA AZƏRBAYCAN XALQ CUMHURİYYƏTİNİN 90 İLLİYİNƏ HƏSR OLUNMUŞ TOPLANTI KEÇİRİLMİŞDİR
AZƏRTAC-ın müxbiri xəbər verir ki, mayın 27-də N.B.Vəzirov adına Lənkəran Dövlət Dram Teatrında Azərbaycan Xalq Cumhuriyyətinin 90 illiyinə həsr olunmuş toplantı keçirilmişdir.
Tədbir iştirakçıları əvvəlcə ümummilli liderimiz Heydər Əliyevin adını daşıyan mərkəzi parkda böyük öndərin abidəsi önünə gül dəstələri düzmüş, Azərbaycanın istiqlaliyyəti və ərazi bütövlüyü uğrunda həlak olanların xatirəsini ehtiramla yad etmiş, teatrın foyesində Respublika gününə həsr olunmuş rəsm əsərləri ilə tanış olmuşlar.
Toplantıda şəhər icra hakimiyyətinin başçısı Süleyman Mikayılov Azərbaycan Demokratik Respublikasının yaranma tarixindən, imperiya buxovlarından qurtularaq müstəqilliyini bərpa edən ölkəmizi məhv olmaq təhlükəsindən xilas edən ümummilli lider Heydər Əliyevin misilsiz xidmətlərindən danışmış, Prezident İlham Əliyevin respublikamızın dinamik inkişafına və xalqımızın həyat səviyyəsinin yaxşılaşdırılmasına yönəldilmiş siyasi kursu yüksək qiymətləndirmişdir.
Mərasimdə rayonun musiqi kollektivləri rəngarəng konsert proqramı ilə çıxış etmiş, teatrın aktyorlarının ifasında ədəbi-bədii kompozisiya nümayiş etdirilmişdir.
Bölmənin digər xəbərləri
