Londonda qul ticarəti ilə əlaqəli olan heykəllər və küçə adları ləğv edilir
London, 9 iyun, AZƏRTAC
Londonun meri Sadiq Xan qul ticarəti və köləliklə əlaqəli olan heykəllərin paytaxt ərazisindən çıxarılmasının və küçə adlarının dəyişdirilməsinin lazım olduğunu söyləyib. O, Londona uyğun olmayan heykəllərin layiqli şəkildə araşdırılaraq götürüləcəyini bildirib. Mer bu işi həyata keçirtmək üçün “İctimai müxtəliflik” adlı komissiya yaradıldığını açıqlayıb. Qeyd edib ki, müvafiq komissiya şəhərdəki divar rəsmlərini, küçə adlarını, heykəlləri və digər abidələri nəzərdən keçirəcək, bunlardan hansının tarixi, mədəni və bədii dəyəri olduğu barədə şəhər rəhbərliyinə məlumat verəcək. Paytaxtdakı heykəllər və küçə adları şəhərin mədəni müxtəlifliyini əks etdirməlidir.
Şəhərdə bəzi mübahisəli heykəllərin götürülməsi ilə bağlı imza toplama kampaniyalarına da başlanılıb.
Qeyd edək ki, bazar günü Bristol şəhərində keçirilən mitinq zamanı XVII əsrdə qul ticarəti ilə məşğul olmuş Edvard Kolstonun tunc heykəli yerə endirilərək Avon çayına atılıb.
Aynurə Tağıyeva
AZƏRTAC-ın xüsusi müxbiri
London
Bölmənin digər xəbərləri
