Maka Boçorişvili: Bakı yüksəksəviyyəli konfransa ev sahibliyi edir
Tbilisi, 18 may, AZƏRTAC
Bakı yüksəksəviyyəli konfransa, müxtəlif dünya liderlərinin və beynəlxalq təşkilatların nümayəndələrinin iştirak etdiyi görüşə ev sahibliyi edir. Əlbəttə ki, bu, Gürcüstan üçün vacib olan məsələlərə diqqət yetirmək baxımından mühüm platformadır. Gürcüstan Baş nazirinin bu tədbirdə iştirakı bizə bir daha ikitərəfli görüşlər keçirmək və bu forum çərçivəsində ölkəmizin mövqelərini səsləndirmək imkanı verəcək.
AZƏRTAC xəbər verir ki, bu sözləri Gürcüstanın Baş nazirinin müavini və xarici işlər naziri Maka Boçorişvili ölkəsinin nümayəndə heyətinin Bakıda keçirilən BMT-nin Ümumdünya Şəhərsalma Forumunun 13-cü Sessiyasında (WUF13) iştirakını şərh edərkən deyib.
Onun sözlərinə görə, Baş nazirin konfransda iştirakı həm Gürcüstanın mövqelərinin səsləndirilməsinə, həm də tərəfdaş ölkələrlə ikitərəfli görüşlərin keçirilməsinə töhfə verəcək.
Səfər çərçivəsində Azərbaycan Prezidenti ilə görüşün də nəzərdə tutulduğunu diqqətə çatdıran Maka Boçorişvili tərəflər arasında Gürcüstan-Azərbaycan strateji tərəfdaşlığının və ikitərəfli əməkdaşlıq məsələlərinin müzakirə ediləcəyinə ümidvar olduğunu bildirib.
“Bildiyiniz kimi, münasibətlər yüksək səviyyədədir, strateji tərəfdaşlığımız var. Azərbaycan vacib tərəfdaşdır və əlbəttə ki, ölkələrimiz arasında prioritet məsələlər üzrə ünsiyyət vacibdir", - deyə xarici işlər naziri əlavə edib.
Bölmənin digər xəbərləri
