MAKEDONİYA POLİSİ YEDDİ PAKİSTANLININ QƏSDƏN QƏTLƏ YETİRİLDİYİNİ ETİRAF ETMİŞDİR
Polisin nümayəndəsi Miriyana Konteska jurnalistlərə bildirmişdir ki, bu cinayətlə əlaqədar artıq polisin keçmiş üç rəhbərinə, Makedoniyanın xüsusi “Şirlər” bölməsinin iki qulluqçusuna və bir biznesmenə qarşı ittiham irəli sürülmüşdür. Bundan əlavə, Makedoniya parlamentinin mandat məsələləri komitəsi keçmiş daxili işlər naziri Lyubo Boşkovskinin deputat toxunulmazlığı hüququndan məhrum olunması barədə qərar qəbul etmişdir.
Prokurorluq Boşkovskini 2002-ci ilin martında Skopye şəhəri yaxınlığında yeddi pakistanlının qətlə yetirilməsi barədə əmr verməkdə ittiham etmişdir. Keçmiş nazir isə jurnalistlərə bildirmişdir ki, komitənin qərarı onun insani və konstitusiya hüquqlarının pozulması deməkdir. Bu məsələ ilə əlaqədar o, qərarın parlamentin bütün deputatları tərəfindən qəbul olunmasını tələb etmişdir.
Makedoniya DİN-in məlumatına görə, həmin yeddi pakistanlı qətlə yetirilməzdən əvvəl Makedoniya-Bolqarıstan sərhədindəki Delçev məntəqəsində Boşkovskinin əmri ilə tutulmuş və Skopyeyə gətirilmişdir. Onları bir ay həbsxanada saxlamış, sonra isə şəhərin kənarına aparıb öldürmüşlər.
Bu cinayəti törətməkdə məqsəd həmin pakistanlıların guya Qərbin diplomatik nümayəndəliklərinə və Makedoniyanın rəsmi şəxslərinə hücum etməyə hazırlaşan terrorçular olduğunu sübuta yetirmək idi. Polis artıq buraxılmış “Şirlər” xüsusi bölməsinin keçmiş generalı Qoran Stoykovu da həbs etmişdir. Pakistanlıların qətlində onun şəxsən iştirak etdiyi bildirilir.
Bölmənin digər xəbərləri
