Mayın 14-15-də ASAN Qlobal Veb Forum keçiriləcək
Bakı, 13 may, AZƏRTAC
Mayın 14-15-də Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin təşəbbüsü ilə “Hökumətlər tərəfindən COVID-19-a qarşı görülən çevik tədbirlər” mövzusunda ASAN Qlobal Veb Forum keçiriləcək.
Agentliyin İctimaiyyətlə əlaqələr şöbəsindən AZƏRTAC-a bildiriblər ki, forumun məqsədi pandemiya dövründə dövlət xidmətlərinin göstərilməsi sahəsində effektivliyi, əlçatanlığı, eyni zamanda, pandemiya ilə mübarizə kontekstində və ondan sonrakı dövrdə sosial innovasiyaların, smart həllərin əvəzedilməz rolunu müzakirə etməkdir. Habelə innovativ yanaşmalar və mexanizmlər istiqamətində təcrübə mübadiləsi əsas prioritetlərdir.
İkigünlük Qlobal Veb Forumda Azərbaycan Respublikasının, o cümlədən müxtəlif dövlətlərin, beynəlxalq təşkilatların və şirkətlərin rəhbər şəxsləri, nazirlər, tanınmış ekspertlər iştirak edəcəklər.
Forum açılış, bağlanış sessiyalarından və 4 fərqli mövzulu paneldən ibarət olacaq. Panel müzakirələr pandemiya dövründə dövlət xidmətlərinin göstərilməsi, bu sahədə sosial innovasiyalar, müvafiq dövrdə logistik problemlər və həlləri, habelə postpandemiya dövründə fəaliyyətin ümumi strategiyası və perspektivləri kimi aktual məsələlərə həsr olunacaq.
Forumun açılış sessiyasının natiqləri ICESCO-nun Baş direktoru Salim M. Al-Malik, Dünya İqtisadi Forumunun Prezidenti Borge Brende, Avropa Xarici Fəaliyyət Xidmətinin (EEAS) rəhbərinin müavini Luk Devigne, BMT İnkişaf Proqramının Astana Hub Dövlət Xidmətləri Mərkəzinin İdarəetmə Komitəsinin sədri Alixan Baymenov, Afrika Birləşmiş Şəhərlər və Yerli İdarəetmə Təşkilatının (UCLG) Baş katibi Jan Pyer Elonq Mbassi və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev olacaqlar.
Moderatorluğu isə məşhur jurnalist, futuroloq (CNN, TEDx, Forbes) İan Xan həyata keçirəcək.
Forum “ASAN xidmət”in “YouTube” kanalında (https://www.youtube.com/user/asanxidmat) və agentliyin “Facebook” səhifəsində (https://www.facebook.com/vxsida/) canlı yayımlanacaq.
Forumun proqramı ilə tanış olmaq üçün link: www.globalwebforum.asan.gov.az
Bölmənin digər xəbərləri
