MƏCBURİ KÖÇKÜNLƏR GÖSTƏRİLƏN DİQQƏT VƏ QAYĞIDAN RAZIDIRLAR

06.04.2006 [14:53]
Çap et
A⁺ A^-

Şəkidə məskunlaşmış 1362 məcburi köçkün ailəsinin sosial problemlərinin həlli rayon rəhbərliyinin və əlaqədar qurumların daim diqqət mərkəzindədir. Şəhər icra hakimiyyətindən AZƏRTAC-ın müxbirinə bildirmişlər ki, erməni təcavüzü nəticəsində öz doğma yurd-yuvalarından didərgin düşən və Şəkidə məskunlaşan soydaşlarımızın elektrik enerjisi və içməli su ilə təminatını yaxşılaşdırmaq məqsədi ilə son bir ildə onların yaşadığı məntəqələrdə 5 transformator və 3 su nasosu quraşdırılmış, 10 kilometr uzunluğunda elektrik xətti çəkilmiş, Çələbixan qəsəbəsində subartezian quyusu istismara verilmişdir.

Soyuqbulaq turist bazasında məskunlaşmış 44 məcburi köçkün ailəsinin yaşadığı mənzillərə qaz xətti çəkilmiş, Kəlbəcər rayonundan olan 209 köçkün ailəsi tikinti materialları ilə təmin edilmiş, kənd təsərrüfatı işləri ilə məşğul olanlara güzəştli şərtlərlə torpaq sahələri verilmiş, köçkünlər yataq dəsti və geyimlə təmin olunmuşlar. Sarıca kəndində məskunlaşan məcburi köçkünlər üçün inşa edilən yeni məktəb binasının tikintisi başa çatmışdır.

Şəkidə məskunlaşmış köçkünlərin məşğulluq problemlərinin həllinə də daim xüsusi diqqət göstərilir. “Şəki-İpək” ASC-nin köməyi ilə Çələbixan qəsəbəsində ötən ildən fəaliyyətə başlayan xalça sexində hazırda 25 nəfər, Göybulaq kəndi ərazisində inşa edilən modul tipli elektrik stansiyasının tikintisində isə 27 nəfər məcburi köçkün işlə təmin olunmuşdur.

MƏCBURİ KÖÇKÜNLƏR GÖSTƏRİLƏN DİQQƏT VƏ QAYĞIDAN RAZIDIRLAR

MÜƏLLİFLƏ ƏLAQƏ