Mehman İsmayılov: Azərbaycan-Serbiya münasibətləri yeni mərhələyə yüksəlib
Bakı, 25 noyabr, AZƏRTAC
Azərbaycanın beynəlxalq nüfuzu getdikcə artır, əlaqələri genişlənir. Prezident, Ali Baş Komandan İlham Əliyevin rəhbərliyi ilə yenilməz ordumuzun Ermənistan üzərindəki şanlı Qələbəsindən sonra ölkəmizlə əməkdaşlıq etmək istəyən dövlətlərin sayı getdikcə artır. İndi Azərbaycan dünyada qalib ölkə kimi tanınır. Dövlətimizin başçısının xarici ölkələrə hər bir səfəri böyük maraqla izlənilir. Hər şeydən əvvəl, qürurla qeyd etmək istərdim ki, Azərbaycan Prezidenti qalib ölkənin lideri kimi qəbul edilir. Elə bir lider ki, 30 il ərzində dünyanın ən nüfuzlu beynəlxalq təşkilatlarının və qüdrətli dövlətlərin nizamlaya bilmədikləri Ermənistan-Azərbaycan, Dağlıq Qarabağ münaqişəsini cəmi 44 gün ərzində həll etdi.
Bu fikirləri AZƏRTAC-a açıqlamasında politoloq Mehman İsmayılov bildirib.
Politoloq deyib ki, dövlətimizin başçısının xarici ölkələrə səfərlərində mühüm əhəmiyyətli sənədlər imzalanır, ölkəmizdə baş verən proseslər, yeniliklər, işğaldan azad edilmiş ərazilərdə aparılan yenidənqurma, tikinti-bərpa işləri barəsində məlumat verilir. Eyni zamanda, postmüharibə dövründə Ermənistanın yenidən atəşkəs rejimini pozmağa cəhd göstərməsi, həmçinin götürdüyü öhdəliklərə əməl etməməsi, müxtəlif bəhanələrlə sülh müqaviləsindən yayınması haqda da məlumat verilir: “Xarici ölkələrə səfərlərdən söz düşmüşkən, qeyd etmək istərdim ki, bu ilin noyabr ayında Azərbaycan Prezidenti Rusiya Federasiyasında işgüzar səfərdə oldu, Əlcəzairdə Ərəb Dövlətləri Liqasının 31-ci Zirvə toplantısında, Özbəkistanda Türkdilli Dövlətləri Təşkilatının IX Zirvə Görüşündə iştirak edib, həmçinin Albaniyada və Serbiyada səfərlərdə olub. Bütün səfərlərdə dövlətimizin başçısı yüksək səviyyədə qarşılanıb”.
M.İsmayılov qeyd edib ki, Serbiyaya səfəri zamanı dövlətimizin başçısının qarşılanma mərasimi hər bir soydaşımızı qürurlandırdı. Təkbətək və geniş tərkibdə keçirilən görüşlərdə iki ölkə arasında əməkdaşlığın daha da genişləndirilməsindən söhbət açılıb. Müxtəlif sahələr üzrə sənədlərin imzalanması da Azərbaycan-Serbiya münasibətlərinin yeni mərhələyə qədəm qoymasından xəbər verir. Serbiya Prezidenti Aleksandar Vuçiçin mətbuata bəyanatla çıxışında ölkəmiz və Prezidentimiz haqqında dediyi xoş sözlər hər birimizdə qürur hissi yaratdı.
Politoloq Serbiya Prezidentinin bəyanatından bəzi məqamları xatırladıb: “Bizim Azərbaycanla bir çox oxşarlığımız var. Hər iki ölkə öz ərazi bütövlüyünü qətiyyətli şəkildə qoruyub saxlayır və biz bir-birimizə beynəlxalq arenada, beynəlxalq təsisat və təşkilatlarda BMT Nizamnaməsinə və beynəlxalq ictimai normalara əməl edərək kömək edirik. Biz bu məsələdə bir-birimizə etibar edə bilərik. Bu gün Prezident Əliyevdən bir çox məsələləri öyrəndik. Yalnız bir neçə ölkənin beynəlxalq hüquq normalarına riayət etməsindən başqa beynəlxalq hüquqdan çox az bir şey qalıb. Biz buna əməl etməyin gələcəyimiz üçün yeganə imkan və seçim olduğunu düşünürük. Bu gün biz Azərbaycanla Birgə Bəyanatı, strateji tərəfdaşlıq və müttəfiqlik haqqında Memorandumu imzaladıq. Biz bu əməkdaşlığı yeni müstəviyə qaldırdıq”.
M.İsmayılov Prezident İlham Əliyevin Serbiyada mətbuata bəyanatı zamanı Azərbaycanın ərazi bütövlüyünün beynəlxalq təşkilatlar tərəfindən tanınması barədə söylədiyi bu fikrinə diqqət çəkib: “Onların arasında, əlbəttə ki, BMT Təhlükəsizlik Şurasının 4 qətnaməsini qeyd etməliyəm. Bu qətnamələrdə erməni silahlı qüvvələrinin Azərbaycan torpaqlarından dərhal, qeyd-şərtsiz və tam şəkildə çıxarılması tələb edilirdi. BMT-nin Baş Assambleyası, İslam Əməkdaşlıq Təşkilatı, Qoşulmama Hərəkatı, Avropa Şurası, Avropa Parlamenti, ATƏT, yəni, bütün aparıcı beynəlxalq təşkilatlar bizim mövqeyimizi dəstəkləyən qərar və qətnamələr qəbul etmişdilər, ancaq məsələ öz həllini tapmırdı. Bu nəyi göstərir? Onu göstərir ki, beynəlxalq təşkilatların qərar və qətnamələri, onların icrası selektiv xarakter daşıyır”.
Politoloq deyib ki, Ermənistan-Azərbaycan məsələsində BMT Təhlükəsizlik Şurasının qətnamələri 27 il kağız üzərində qaldı. Azərbaycan Prezidentinin qeyd etdiyi kimi, dünya ictimaiyyəti beynəlxalq təşkilatların gələcək fəaliyyəti ilə bağlı öz təkliflərini verməlidir. Çünki artıq belə aparıcı beynəlxalq təşkilatlara qarşı inamsızlıq yaranıb. Əgər nüfuzlu təşkilatların qəbul etdikləri qərarlar həyatda öz əksini tapmırsa və ya yerinə yetirilmirsə, təbii ki, bu təşkilatlara qarşı inamsızlıq formalaşmalıdır.
“Azərbaycan Prezidenti işğaldan azad edilmiş ərazilərdə görülən işlərdən, təbii qaz, elektrik enerjisi və digər sahələrdəki əməkdaşlıqdan da danışdı. Bütün bunlar Azərbaycan-Serbiya münasibətlərinin yeni mərhələyə qədəm qoymasından xəbər verir”, - deyə politoloq bildirib.
Bölmənin digər xəbərləri
