Mehmanxana və digər yerləşdirmə obyektlərində çalışanlar üçün təlim-tədris kursları təşkil olunacaqdır
Bakı, 16 may (AZƏRTAC). Azərbaycanın Mədəniyyət və Turizm Nazirliyi Türkiyənin Mədəniyyət və Turizm Nazirliyinin, Azərbaycan Turizm İnstitutunun, Milli Kulinariya Mərkəzinin və Türk Əməkdaşlıq və İnkişaf İdarəsinin (TİKA) dəstəyi ilə respublikamızın turizm potensiallı şəhər və rayonlarında fəaliyyət göstərən mehmanxana və digər yerləşdirmə obyektlərində çalışanlar üçün təlim-tədris kursları təşkil edəcəkdir.
Mədəniyyət və Turizm Nazirliyinin mətbuat xidmətindən AZƏRTAC-a bildirmişlər ki, bununla əlaqədar ölkəmizin Şimal-qərb bölgəsi üzrə mayın 20-dən 30-dək İsmayıllı rayonunda, Cənub bölgəsi üzrə mayın 25-dən iyunun 5-dək Lənkəran şəhərində, Şimal bölgəsi üzrə iyunun 1-dən 10-dək Xaçmaz rayonunda, Qərb bölgəsi üzrə isə iyunun 5-dən 10-dək Gəncə şəhərində xidmət sahəsinə dair təlim-tədris kurslarının keçirilməsi planlaşdırılır.
Təlim-tədris kurslarında əsasən hotel menecmenti, qeyd-qəbul, masa xidməti, xadimə, aşpaz və digər peşələr üzrə dərsləri Türkiyədən dəvət olunmuş müəllimlər, Azərbaycan Turizm İnstitutunun və Milli Kulinariya Mərkəzinin mütəxəssisləri tədris edəcəklər.
Bu istiqamətdə treninqlər regionlarda fəaliyyət göstərən mehmanxana və ona bərabər tutulan yerləşdirmə obyektlərində xidmətin səviyyəsinin yüksəldilməsinə və turizmin inkişafına öz töhfəsini verəcəkdir.
Bölmənin digər xəbərləri
