Məktəblilər üçün peşəyönümü sessiyaları təşkil olunur
Bakı, 2 fevral, AZƏRTAC
Azərbaycan Respublikası Təhsil Nazirliyinin “Təhsildə inkişaf və innovasiyalar üzrə” IV qrant müsabiqəsinin qalibi olan 234 nömrəli tam orta məktəbin həyata keçirdiyi “Mənim peşəm” layihəsi çərçivəsində peşəyönümü sessiyaları təşkil edilir.
Peşə Təhsili üzrə Dövlət Agentliyindən AZƏRTAC-a bildirilib ki, hazırda şagirdlərin sorğusu əsasında formalaşdırılan turizm-xidmət, dizayn, İKT istiqamətləri üzrə məlumatlandırma sessiyaları aparılır. Sözügedən layihə çərçivəsində peşəyönümlü məlumatlandırma sessiyalarından əlavə ustad dərsləri, profil üzrə ixtisaslaşma seçimləri, baza məlumatlandırma və biliklərin verilməsi nəzərdə tutulur. Eyni zamanda, işəgötürənlərin əmək bazarı və ölkədəki məşğulluq barədə təqdimat və sual-cavab sessiyalarına qatılması planlaşdırılır.
Sözügedən ixtisaslar üzrə peşəyönümü tədbirləri Sənaye və İnnovasiyalar, Turizm və Sosial Xidmət, Mədəniyyət və Sənətkarlıq üzrə Bakı Dövlət Peşə Təhsil mərkəzləri tərəfindən 3 ay müddətində (həftədə bir dəfə) təşkil olunacaq.
Bölmənin digər xəbərləri
