Mərkəzi Bankda tədqiqat işlərinin ictimai müzakirəsi aparılıb
Bakı, 20 fevral, AZƏRTAC
Azərbaycan Mərkəzi Bankı (AMB) daxili və xarici iqtisadiyyatda, maliyyə bazarlarında baş verən prosesləri davamlı olaraq təhlil və tədqiq edir. Bu çərçivədə hər il həyata keçirilmiş tədqiqatların bankdaxili müzakirəsi təşkil olunur. Cari ildə ilk dəfə olaraq bu tədqiqatların geniş ictimai müzakirəsi keçirilib.
AMB-dan AZƏRTAC-a bildirilib ki, ictimai müzakirələr “tədqiqat həftəsi” adı ilə vebinar formatında olub. Vebinar müzakirələri hər gün bir tədqiqat işi olmaqla, 5 tədqiqat işinə həsr edilib. Vebinarlarda müxtəlif universitetlərin müəllim və tələbələri, həmçinin dövlət qurum və orqanlarının əməkdaşları iştirak edib. İctimai müzakirələr zamanı iştirakçılara cari əməliyyatlar balansı əsas komponentlərinin qiymətləndirilməsi və proqnozlaşdırılması, Azərbaycanda inflyasiyanın iqlim dəyişikliklərinə reaksiyasının qiymətləndirilməsi, ev təsərrüfatlarının istehlakı üzrə naukastinq modelinin qurulması, bank kreditlərinin tələb və təklif amillərinin qiymətləndirilməsi, ödəniş məlumatları əsasında ÜDM-in naukastinqi modelinin qurulması mövzularında tədqiqat işləri təqdim olunub.
Hər gün orta hesabla 2 saat davam edən müzakirələrdə iştirakçıların çoxsaylı sualları cavablandırılıb, onların rəy və təklifləri növbəti tədqiqatlarda nəzərə alınmaq məqsədilə dinlənilib.
Mərkəzi Bankda növbəti illərdə aparılacaq tədqiqatların da açıq ictimai müzakirəsinin keçirilməsi nəzərdə tutulur.
Bölmənin digər xəbərləri
