MİLLİ AVİASİYA AKADEMİYASINDA NARKOMANİYANIN FƏSADLARINA HƏSR OLUNMUŞ TƏDBİR KEÇİRİLMİŞDİR
AZƏRTAC xəbər verir ki, aprelin 9-da Milli Aviasiya Akademiyasında “Gənclər narkomaniyaya qarşı” mövzusunda tədbir keçirilmişdir.
Bakı Şəhər Gənclər və İdman Baş İdarəsinin təşkil etdiyi tədbirin məqsədi gəncləri narkomaniyanın fəsadları və insan həyatı üçün təhlükə doğuran bəzi yoluxucu xəstəliklərlə bağlı məlumatlandırmaq olmuşdur.
Akademiyanın tələbələri qarşısında çıxış edən “Hüquqi İnkişaf və Demokratiya” İctimai Birliyinin sədri Zülfiyyə Mustafayeva bildirmişdir ki, ölkəmizdə QİÇS, HİV və digər bu kimi təhlükəli xəstəliklərə yoluxma hadisələri bir çox hallarda narkotiklərin istifadəçiləri arasında qeydə alınmışdır. Z.Mustafayeva demişdir ki, hazırda Azərbaycanda rəsmi olaraq 1379 nəfər HİV daşıyıcısı yaşayır ki, onların da 71 faizi narkotik vasitələrin aludəçiləridir.
Respublika QİÇS-lə Mübarizə Mərkəzinin həkimi Səbinə Babazadə əsrin bəlasına çevrilmiş bu xəstəliklərlə əlaqədar gənclərin maarifləndirilməsi işinin zəruriliyindən danışmış, insanın hansı vasitələrlə bu xəstəliklərə yoluxması və ondan qorunmanın mümkünlüyü barədə ətraflı söhbət açmışdır.
Sonda tələbələri maraqlandıran suallar cavablandırılmışdır.
Bölmənin digər xəbərləri
