MİLLİ MƏCLİS AZƏRBAYCAN VƏ İSVEÇRƏ HÖKUMƏTLƏRİ ARASINDA İMZALANMIŞ SAZİŞİ TƏSDİQ ETMİŞDİR

09.03.2004 [20:12]
Çap et
A⁺ A^-

Milli Məclisin martın 9-da keçirilən iclasında “Azərbaycan Respublikası Hökuməti ilə İsveçrə Konfederasiyası Hökuməti arasında kadastr layihəsi üzrə maliyyə yardımına dair” Saziş müzakirə olunmuşdur.

Parlamentin aqrar siyasət daimi komissiyasının sədri Eldar İbrahimov AZƏRTAC-ın müxbirinə demişdir ki, 2003-cü ilin may ayında imzalanmış bu sənədə görə İsveçrə Hökuməti Azərbaycanın kənd təsərrüfatının ayrı-ayrı sahələrinə 3,5 milyon İsveçrə frankı (2 milyon ABŞ dolları və ya 4 milyard manat) məbləğində əvəzi ödənilməyən qrant verəcəkdir. Bu vəsait hesabına maliyyələşdiriləcək mal və ya xidmətlər idxal rüsumlarından, maliyyə ödəmələri və Azərbaycan qanunvericiliyinə əsasən nəzərdə tutulmuş hər hansı bir vergi ödənişindən azad olunacaqdır. Bu Saziş qüvvəyə mindikdən sonra 5 il müddətinə təzminatın istifadə olunmamış hər hansı bir hissəsi tərəflər arasında qaşılıqlı surətdə razılaşdırılmış digər qərar olmazsa ləğv ediləcəkdir.

Deputatlar sənədi müzakirə etdikdən sonra təsdiq etmişlər.