Milli Məclis ilə Avropa Parlamenti arasında videoformatda görüş keçirilib
Bakı, 2 fevral, AZƏRTAC
Milli Məclis ilə Avropa Parlamenti arasında videoformatda görüş keçirilib.
AZƏRTAC xəbər verir ki, görüşdə Avropa İttifaqı-Azərbaycan Parlament Əməkdaşlıq Komitəsinin həmsədrləri Cavanşir Feyziyev və Marina Kalyurand bölgəmizdəki son durumu müzakirə ediblər.
Cavanşir Feyziyev Azərbaycan, Rusiya və Ermənistan arasında dövlət başçıları səviyyəsində keçirilən 11 yanvar görüşündə qəbul olunmuş qərarları xatırladıb. Bu günlərdə hər üç ölkənin baş nazir müavinləri səviyyəsində yaradılmış formatda keçirilən ilk görüşdə bölgədə nəqliyyat kommunikasiyalarının bərpası haqqında fikir mübadiləsi aparıldığı diqqətə çatdırılıb. Deputat işğaldan azad olunmuş ərazilərdə Azərbaycan hökuməti tərəfindən aparılan quruculuq işləri haqqında ətraflı məlumat verib. O, həmçinin işğal altında qalmış ərazilərdə bütün infrastruktur və yaşayış binalarının, o cümlədən Azərbaycan tarixinə aid maddi-mədəni abidələrin dağıdıldığını qeyd edib, xüsusilə məscidlərin və digər dini abidələrin yer üzündən silinməsi və muzeylərin qarət olunması haqqında avropalı həmkarını məlumatlandırıb.
Postmünaqişə dövrünün tənzimlənməsi ilə bağlı sual ətrafında müzakirələr zamanı Milli Məclisin deputatı bu günlərdə Türkiyə-Rusiya Birgə Monitorinq Mərkəzinin fəaliyyətə başladığını diqqətə çatdırıb. O bildirib ki, bölgədəki nəqliyyat-kommunikasiya xətlərinin qarşılıqlı surətdə açılması Azərbaycan-Ermənistan münasibətlərinin də praqmatik gündəlik əsasında formalaşacağına zəmin yaradacaq və daha geniş miqyasda regional əməkdaşlığı stimullaşdıracaq. Avropa Parlamenti təmsilçisinin ermənilərin tez-tez qaldırdığı “hərbi əsirlər” məsələsinə münasibət bildirən Cavanşir Feyziyev deyib ki, bu məsələ Ermənistan təmsilçiləri tərəfindən dünya birliyinə və o cümlədən beynəlxalq mediaya düzgün təqdim olunmur. Məsələnin mahiyyəti ondan ibarətdir ki, noyabrın sonu-dekabrın əvvəllərində əsir götürülmüş erməni hərbçilərinin hüquqi statusu müharibə əsirləri statusundan fərqlidir.
Deputat bildirib ki, 2020-ci il noyabrın 10-da tərəflər arasında atəşkəs haqqında Bəyanat imzalandıqdan sonra həmin Bəyanatın müvafiq bəndinə uyğun olaraq bütün müharibə əsirləri qarşılıqlı surətdə geri qaytarılıb. Hazırda Azərbaycanda həbsdə saxlanan hərbçilər isə atəşkəs rejiminin qüvvədə olduğu dövrdə beynəlxalq qanunlara zidd olaraq Ermənistan tərəfindən Azərbaycan ərazisinə terror aktları və diversiyalar təşkil etmək məqsədilə göndərilib. Digər tərəfdən, həbsdə olan erməni hərbçiləri arasında 90-cı illərdə Azərbaycan ərazisində xüsusilə ağır cinayətlər törətmiş şəxslər də var ki, onlar törətdikləri cinayət əməllərinə görə məsuliyyət daşıyırlar və hərbi əsirlər hesab oluna bilməzlər. Deputatın səsləndirdiyi fikirlərlə razılaşdığını bildirən xanım Marina Kalyurand hökumətlərarası kontakt qruplarında bu məsələlərə aydınlıq gətiriləcəyinə əmin olduğunu bildirib.
Tərəflər Milli Məclislə Avropa Parlamenti arasında əlaqələrin pandemiya dövrünün tələblərinə uyğun şəkildə davam etdirilməsi və növbəti görüşün gələn ay ərzində daha geniş tərkibdə keçirilməsi haqqında razılaşıblar.
Bölmənin digər xəbərləri
