Hörmətli xanımlar və cənablar!

Yaradıcı və böyük şəxsiyyətlər cəmiyyət həyatının təkcə görünən telləri ilə deyil, həm də maddi olmayan və ona görə də dərk edilməyən strukturları vasitəsilə öz zəmanəsinə bağlı olur. Şəxsiyyətin intellektual ənənədən qaynaqlanan siyasi və sosial novatorluğu isə, tarixi məqamın tələblərini yerinə yetirmək qabiliyyəti ilə ölçülür.

Böyük insanların həyat və fəaliyyəti tam anlaşılması mümkün olmayan sirlərlə doludur. Bizi tərk etdikdən sonra da onların əsrarəngiz əzəməti cəmiyyətin həyatına işıq salır, şəxsiyyətlərin əfsanəvi ucalığı mənsub olduqları xalqı irəliyə çəkib aparan yolgöstərənə, bələdçiyə çevrilir. O dahilər xoşbəxt sayıla bilər ki, öz zəhmətlərinin bəhrəsini görə bilir və həyata keçirdiyi işlərin müqabilində xalqının əbədi minnətdarlığını qazanırlar.

Ümummilli liderimiz Heydər Əliyev xoşbəxt dahidir. O, həyatının mənası saydığı müstəqil Azərbaycan dövlətini qoruyub yaşatdı, Vətən üçün gördüyü işlərə görə xalqının qəlbində özünə möhtəşəm abidə ucaltdı. Bugünkü qüdrətli Azərbaycan onun xalqa məhəbbətinin, vətən yolunda fədakarlığının əsrlər boyu solmayacaq parlaq nişanəsidir.

Ümummilli liderimizin Azərbaycanda hakimiyyətə hər iki gəlişi ölkəmizin və xalqımızın həyatının çox ağır dövrünə təsadüf etmişdir. Daha doğrusu, cəmiyyətin və dövlətin çəkildiyi ağır sınaqlar bu müdrik və uzaqgörən siyasətçinin, dahi rəhbərin hakimiyyətə gəlməsini tarixi bir zərurət kimi irəli sürmüşdür. Heydər Əliyevin Azərbaycana ilk dəfə rəhbərlik etdiyi 1969-82-ci illər tənəzzüldən və gerilikdən inkişafa və tərəqqiyə keçid dövrü kimi tarixə düşdü. Ölkə həyatının bütün sahələrində qazanılmış böyük nailiyyətlər, cəmiyyətdə baş verən canlanma və tərəqqi, xalqımızın milli mənlik şüurunun və siyasi təfəkkürünün inkişaf etdirilməsi üçün görülən düşünülmüş tədbirlər Azərbaycanın gələcək dövlət müstəqilliyi üçün möhkəm təməl yaratdı.

Aqillər deyiblər ki, şəxsiyyəti olmayan xalqın azadlıq uğrunda mübarizə aparması ağlasığmazdır. Xalq öncə şəxsiyyət ətrafında birləşir, yalnız bundan sonra ideyalar haqqında düşünməyə başlayır. Bu kəlamın nə qədər doğru olduğunu Azərbaycan xalqı 1987-93-cü illərdə düçar edildiyi fəlakətlərin və itkilərin timsalında bir daha görüb yəqin etdi.

Ermənistandan qaçqınların axını, Sumqayıt fitnəkarlığı, Qanlı Yanvar faciəsi, xalqımızın böyük zəhmət hesabına topladığı maddi və mənəvi sərvətlərin talan edilməsi, Xocalı soyqırımı, Şuşanın, Laçının, digər torpaqlarımızın işğal edilməsi, insanlarımızın yerindən-yurdundan didərgin salınması – bütün bunlar olmaya da bilərdi. Əgər o dövrdə Azərbaycana Heydər Əliyev rəhbərlik etsəydi, düşmənlərimiz bu məkrli planlarının heç birini həyata keçirə bilməzdilər.

1993-cü ildə xalqın tələbi ilə ümummilli liderimizin hakimiyyətə qayıtması Azərbaycana nicat gətirdi, bədxahlarımızın çirkin niyyətlərini gözlərində qoydu. Heydər Əliyevin sayəsində Azərbaycan uçurumun bir addımlığından geri döndü, itirmək üzrə olduğu siyasi və dövlət müstəqilliyini qoruyub saxlaya bildi, xalqımız yadların əsarətinə düşmək təhlükəsindən xilas oldu.

Vətəndaş müharibəsinin, ölkənin parçalanmasının qarşısı alındı, respublikada ictimai-siyasi sabitlik yarandı. Müstəqil dövlətimizə layiq milli ordu quruculuğuna başlandı, həyatın bütün sahələrini bürümüş tənəzzülə son qoyuldu. Bütün bunlar hüquqi, demokratik və dünyəvi dövlət, vətəndaş cəmiyyəti qurmaq, bazar iqtisadiyyatı prinsiplərini bərqərar etmək məqsədi ilə əsaslı islahatların həyata keçirilməsinə əlverişli şərait yaratdı.

Yeni neft və iqtisadi inkişaf strategiyası öz bəhrəsini verdi, iqtisadiyyata külli miqdarda xarici sərmayə cəlb edildi, iqtisadi inkişafa yol açdı. Ölkəmiz Bakı-Tbilisi-Ceyhan neft kəmərinin, Bakı-Tbilisi-Ərzurum qaz kəmərinin çəkilişi, tarixi İpək yolunun bərpası kimi nəhəng transmilli layihələrin təşəbbüsçüsünə və fəal iştirakçısına çevrildi.

Qanunun aliliyi, insan və vətəndaş hüquqlarının qorunması təmin edildi, söz, fikir azadlığına, siyasi plüralizmə geniş meydan açıldı. Yeni Konstitusiya qəbul edildi, peşəkar qanunvericilik orqanı yaradıldı. Müasir dünyanın tələblərinə uyğun olan idarəçilik sistemi formalaşdırıldı.

Ölkəmiz dünya birliyində layiq olduğu yerini tutdu, Avropa xalqları ailəsinə daxil oldu. Haqq səsimiz dünyanın ən mötəbər kürsülərindən eşidildi. Bu gün Azərbaycan bir çox nüfuzlu beynəlxalq təşkilatların, o cümlədən BMT-nin, ATƏT-in, Avropa Birliyinin, Qara Dəniz İqtisadi Əməkdaşlıq Təşkilatının, İslam Konfransı Təşkilatının, Müstəqil Dövlətlər Birliyinin, İqtisadi Əməkdaşlıq Təşkilatının bərabərhüquqlu üzvü, GUÖAM regional qurumunun təşəbbüsçüsü və fəal iştirakçısıdır.

Heydər Əliyevin dövlətçilik, azərbaycanlılıq ideyaları şüurlara hakim kəsildi. Dilimizin, mənəvi dəyərlərimizin qorunması, dünyanın müxtəlif bölgələrində yaşayan soydaşlarımızın tarixi vətənlə əlaqələrinin gücləndirilməsi məqsədi ilə düşünülmüş tədbirlər görüldü.

Ümummilli liderimizin müdrik və uzaqgörən siyasəti ölkəmizin siyasi və dövlət müstəqilliyini əbədi, dönməz və sarsılmaz etmişdir. Heydər Əliyevin həyatı və fəaliyyəti doğma xalqına sədaqətlə xidmət etmək, onun yolunda hər cür məhrumiyyətlərə dözmək nümunəsinə çevrilmişdir.

Heydər Əliyev ömrünün hər günü indiki və gələcək nəsillər üçün bir örnəkdir. Tamamilə məntiqidir ki, onun həyatına və fəaliyyətinə həsr olunan araşdırmalar zaman keçdikcə daha geniş sahəni əhatə edir. Son illər Azərbaycanda ulu öndərimizin fəaliyyətindən bəhs edən bir sıra kitablar çap olunmuşdur. Ümummilli liderimizin siyasi irsinin öyrənilməsi yönündə aparılan tədqiqatların geniş vüsət almasının Azərbaycanda peşəkar siyasətçilərin yeni nəsillərinin yetişməsi işinə böyük kömək göstəcəyinə əminəm.

Bu baxımdan təqdimat mərasiminə toplaşdığımız “Dünyanı heyran qoyan insan” kitabını mən dəyərli bir vəsait kimi ürəkdən təqdir edir, bu əsərin yaradılmasında zəhməti olanların hamısına minnətdarlığımı bildirirəm. Fəlsəfə elmləri doktoru, professor Ramiz Mehdiyevin kitabda verilmiş “Əsl vətəndaş, böyük şəxsiyyət və qüdrətli lider haqqında bəzi düşüncələr” məqaləsi Heydər Əliyev irsinin öyrənilməsinə qiymətli bir töhfədir. Dünyanın tanınmış siyasi və ictimai xadimlərinin, dövlət başçılarının ümummilli liderimiz haqqında kitabda toplanmış ürək sözləri Heydər Əliyev fenomenini daha dərindən anlamağa kömək göstərir.

Böyük öndərimizin başladığı nəhəng işləri bu gün möhtərəm Prezidentimiz İlham Əliyev Heydər Əliyevin siyasi varisinə xas olan qətiyyət, əzmkarlıq və müdrikliklə davam etdirir. Dövlətimiz ümummilli liderimizin yaratdığı möhkəm və sarsılmaz təməl üzərində günbəgün daha da inkişaf edir, beynəlxalq aləmdə mövqelərini möhkəmləndirir. Heydər Əliyevin müəyyən etdiyi yol Azərbaycanı xoş gələcəyə, xalqımızı firavanlığa və səadətə aparır.

Ümummilli liderimizin ruhu bizi heç vaxt tərk etməyəcək, dövlətimizi və millətimizi yeni-yeni qələbələrə səsləyəcəkdir.

Diqqətinizə görə sağ olun!