MİLLİ MƏCLİSDƏ QƏBUL
Sentyabrın 13-də Milli Məclisin sədri Murtuz Ələsgərov Böyük Britaniya parlamenti lordlar palatasının üzvü, Dünya Yəhudi Konqresinin vitse-prezidenti lord Caneri qəbul etmişdir.
Murtuz ƏLəsgərov qonağı səmimiyyətlə salamlayaraq bildirdi ki, onun səfəri parlamentlərarası əlaqələrin möhkəmləndirməsində böyük əhəmiyyətə malikdir. Bundan əlavə Dünya Yəhudi Konqresinin vitse-prezidenti kimi, lord Canerin Azərbaycandakı yəhudi icmalarının həyatı ilə tanış olmaq imkanı var. Milli Məclisin sədri ümidvar olduğunu bildirdi ki, qonaq Azərbaycan haqqında həqiqəti bütün dünyanın yəhudi icmasına çatdıracaqdır. O bunu da əlavə etdi ki, Azərbaycanda yaşayan yəhudilər bütün vətəndaş hüquqlarından istifadə edirlər və onlar ölkəmizdə heç vaxt ayrı-seçkiliyə məruz qalmamışlar. Keçmiş Sovet İttifaqının digər respublikalarından fərqli olaraq, Azərbaycandan yəhudilərin kütləvi mühacirəti də olmamışdır.
Murtuz Ələsgərov Böyük Britaniya ilə Azərbaycan arasında münasibətlərin inkişafından danışaraq dedi ki, ölkəmizin rəhbərliyi dünyanın ən inkişaf etmiş ölkələrindən biri olan bu ölkə ilə dövlətlərarası əlaqələrin möhkəmlənməsinə böyük əhəmiyyət verir. Yüksək səviyyədə keçirilən görüşlər münasibətlərin inkişafında az rol oynamamışdır. Azərbaycan Prezidenti Heydər Əliyev 1994-cü ildən etibarən bir neçə dəfə Böyük Britaniyada olmuş və həmin səfərlərin gedişində mühüm sənədlər, 1995-ci ildə çox mühüm sənəd - iki ölkə arasında əməkdaşlıq haqqında bəyannamə imzalanmışdır. Azərbaycan Prezidenti Londonda faşizm üzərində qələbənin 50 illiyinə həsr olunmuş tədbirlərdə də iştirak etmişdir. Adam Smitt İnstitutunda keçirilmiş mətbuat konfransında da əməkdaşlığın perspektivləri müzakirə olunmuşdur. 1998-ci ildə dövlətimizin başçısının Londonda baş nazir Toni Bleyerlə görüşü ikitərəfli münasibətlərin möhkəmlənməsində mühüm mərhələ oldu.
Parlamentlərarası əlaqələrin inkişafından söhbət açan Murtuz Ələsgərov 1996-cı ildə Prezident Heydər Əliyevin dəvəti ilə Böyük Britaniya parlamenti nümayəndələrinin ölkəmizə səfərini xüsusi vurğuladı. Bundan sonra Azərbaycan parlamentinin nümayəndə heyəti də Londonda olmuş və qanun yaradıcılığı sahəsində əməkdaşlığa dair faydalı fikir mübadiləsi aparmışdır. Bu yaxınlarda isə Böyük Britaniya parlamentinin lordlar və icmalar palatalarının 4 üzvü Bakıya gəlmiş, Azərbaycan Prezidenti ilə görüşmüş, habelə Milli Məclisdə iki ölkənin qanunvericilik orqanlarının əməkdaşlığı perspektivlərini müzakirə etmişlər.
Milli Məclisin sədri Ermənistan-Azərbaycan, Dağlıq Qarabağ münaqişəsinin səbəbləri və nəticələri, problemin sülh yolu ilə həllinə dair danışıqlar prosesi barədə də məlumat verdi. O dedi ki, bu münaqişənin həllində dünyanın yəhudi icmasının dəstəyi ölkəmiz üçün çox vacibdir.
Müfəssəl məlumata görə təşəkkür edən Lord Caner parlament sədrinin belə bir fikri ilə razı olduğunu bildirdi ki, Azərbaycanda yaşayan yəhudilər bütün vətəndaş hüquqlarından istifadə edirlər və burada heç vaxt antisemitizm olmamışdır. “Mən bu barədə iki həftədən sonra İsraildə keçiriləcək Dünya Yəhudi Konqresinin konfransında məruzə edəcəyəm”.
Lord Caner Murtuz Ələsgərova üstündə lordlar palatasının emblemi olan çini qab hədiyyə etdi.
Bölmənin digər xəbərləri
