Bakı, 12 fevral, AZƏRTAC

Fevralın 12-də Azərbaycan Respublikası Milli Məclisinin növbəti plenar iclası keçirilib.

AZƏRTAC xəbər verir ki, iclası açan Milli Məclisin sədri Oqtay Əsədov gündəliyi elan edib.

İclasda ədliyyə nazirinin müavini Vilayət Zahirov bələdiyyələrin fəaliyyətinə inzibati nəzarətə dair illik məruzə ilə çıxış edib. Bildirilib ki, 2015-ci ildə respublikamızın ictimai-siyasi həyatında ənənəvi xarakter almış dinamik inkişaf prosesi və əldə olunan nəticələr bələdiyyələrin də inkişafına müsbət təsir göstərib.

Nazir müavini qeyd edib ki, ötən il Ədliyyə Nazirliyinin Bələdiyyələrlə İş Mərkəzi bələdiyyələrin maarifləndirilməsi və inzibati nəzarət işini gücləndirib, korrupsiya və digər hüquqpozmalarına qarşı mübarizəni artırıb. İnzibati nəzarəti həyata keçirən ədliyyə orqanlarının işinin yaxşılaşdırılması, regional ədliyyə şöbələrinə və bələdiyyələrə metodiki köməyin gücləndirilməsi, bu sahədə çalışan kadrların bilik səviyyəsinin yüksəldilməsi istiqamətində tədbirlər davam etdirilib. Bələdiyyələrin işinin təşkili ilə bağlı aktual mövzularda maarifləndirici tədbirlər təşkil edilib. Maarifləndirici tədbirlər bələdiyyələrin fəaliyyətində şəffaflığın artırılması, “Bələdiyyə qulluqçularının etik davranış qaydaları haqqında” Qanundan irəli gələn vəzifələr, torpaq qanunvericiliyinin pozulması hallarına qarşı mübarizənin gücləndirilməsi, vergi ödənişlərinin yığılmasında şəffaflığın təmin olunması və digər mövzuları əhatə edib.

Diqqətə çatdırılıb ki, bələdiyyələrin fəaliyyətinə inzibati nəzarəti həyata keçirən orqana mütləq təqdim olunan bələdiyyə aktlarının vaxtında təqdim edilməməsinə görə inzibati xəta haqqında 388 protokol tərtib edilərək məhkəmələrə göndərilib. Onlardan 35-i təkrar inzibati xəta ilə bağlı olub. Həmin protokollar əsasında 330 bələdiyyə sədri məhkəmələr tərəfindən inzibati məsuliyyətə cəlb edilib.

Bildirilib ki, ötən il ümumilikdə 2093 müraciətə baxılıb. 107 müraciət tam, 20 müraciət isə qismən təmin olunub. Daxil olan müraciətlərdən 65-i hüquqi qiymət verilməsi üçün prokurorluq orqanlarına göndərilib. Kifayət qədər səbəblər və əsaslar müəyyən edildiyindən 10 material üzrə cinayət işi başlanılıb, 2 cinayət işi barədə məhkəmə hökmü çıxarılıb və bələdiyyə sədrləri məhkum olunublar.

2015-ci ildə inzibati nəzarət qaydasında baxılması üçün ədliyyə orqanlarına daxil olmuş 58928 bələdiyyə aktının normativ hüquqi aktlara uyğunluğu öyrənilib, nazirliyin təklifləri əsasında müvafiq bələdiyyələr tərəfindən 1169 akt ləğv edilib, 531 akt dəyişdirilib. Bələdiyyə aktlarının dəyişdirilməsi və ya ləğv edilməsi ilə bağlı məhkəmələrdə 19 iddia qaldırılıb.

Həyata keçirilən tədbirlər nəticəsində il ərzində bələdiyyələr tərəfindən qanunsuz ayrılmış 1406 hektara yaxın torpaq sahəsinin geri qaytarılması təmin olunub.

Vilayət Zahirov, eyni zamanda, yerli özünüidarə sahəsində beynəlxalq əlaqələrin inkişaf etdirilməsi, qarşılıqlı səmərəli əməkdaşlıq şəraitində həyata keçirilən tədbirlər barədə məlumat verib.

İclasda “Azərbaycan Respublikası Prezidentinin və Belarus Respublikası Prezidentinin Birgə Bəyannaməsinin təsdiq edilməsi haqqında” qanun layihəsinə və “Azərbaycan Respublikası ilə Belarus Respublikası arasında 2025-ci ilədək sosial-iqtisadi əməkdaşlıq haqqında” Müqavilənin və onun Proqramının təsdiq edilməsi barədə qanun layihəsinə baxılıb.

“Avtomobil nəqliyyatı haqqında” Azərbaycan Respublikasının Qanununda dəyişiklik edilməsi barədə qanun layihəsinə əsasən sənədin 27.1-ci maddəsi yeni redaksiyada verilir. Belə ki, avtobuslarla sərnişin daşımalarına “D” kateqoriyası üzrə nəqliyyat vasitələrini idarə etmək hüququnu təsdiq edən sürücülük vəsiqəsi olan, (yaşı 22-dən az və 65-dən çox olmayan və avtonəqliyyat vasitələrini idarə etmək sahəsində təcrübəsi beş ildən az olmayan), “DE” kateqoriyası üzrə nəqliyyat vasitələrini idarə etmək hüququnu təsdiq edən sürücülük vəsiqəsi olan, (yaşı 25-dən az və 65-dən çox olmayan və “D” kateqoriyasına daxil olan avtonəqliyyat vasitələrini idarə etmək sahəsində təcrübəsi üç ildən az olmayan) sürücülər buraxılır.

Bildirilib ki, bu qanun layihəsi avtomobil nəqliyyatı ilə sərnişin daşımaları sahəsində təhlükəsizliyin təmin edilməsi və məsuliyyətin artırılması ilə əlaqədar sərnişin avtomobil nəqliyyatı vasitələrini idarə edən (avtobuslarla sərnişin daşıyan) sürücülərə dair tələblərin yenilənməsi məqsədilə hazırlanıb.

Plenar iclasda, həmçinin “Bələdiyyələrin əraziləri və torpaqları haqqında” Qanuna əlavə edilmiş “Azərbaycan Respublikası bələdiyyələrin siyahısı”nda dəyişiklik edilməsi barədə qanun layihəsinə baxılıb. Sənəddə “Azərbaycan Respublikası bələdiyyələrin siyahısı”nın “Babək rayonu” bölməsinin 59.13-cü bəndinin ləğv edilməsi nəzərdə tutulur.

Deputatlar, həmçinin “Lisenziyalar və icazələr haqqında” qanun layihəsini də ikinci oxunuşda müzakirə ediblər. Bildirilib ki, bu qanun layihəsi sahibkarlıq mühitinin daha da yaxşılaşdırılması, maneələrin aradan qaldırılması, yeni təsərrüfat subyektlərinin yaradılması istiqamətində əhəmiyyətli nəticələr verəcək. Qanun layihəsi Azərbaycan Respublikasında hüquqi və fiziki şəxslər tərəfindən ayrı-ayrı fəaliyyət növlərinin və hərəkətlərin (tədbirlərin) həyata keçirilməsi üçün xüsusi razılıq (lisenziya) və icazə verilməsinin hüquqi, iqtisadi və təşkilati əsaslarını müəyyən edir.

Qeyd edilib ki, qanun layihəsi sahibkarlıq subyektlərinə lisenziya və icazələrin verilməsi prosedurunun sadələşdirilməsi və vətəndaş məmnunluğunun artırılması, qaydaların təkmilləşdirilməsi məqsədilə hazırlanaraq Milli Məclisə təqdim olunub. Sənəd beynəlxalq təcrübəyə əsasən hazırlanıb. Vurğulanıb ki, burada predmet əsasən Azərbaycanda lisenziya və icazələr sisteminin tənzimlənməsidir. Bu qanun layihəsində yeniliklərdən biri də icazələrin hüquqi əsasının qanun şəklində formalaşdırılmasıdır.

İclasda “Antidempinq, kompensasiya və mühafizə tədbirləri haqqında” qanun layihəsi də müzakirə olunub. Bildirilib ki, qanun layihəsi Azərbaycan Respublikası Konstitusiyasının 94-cü maddəsinin I hissəsinin 2-ci və 26-cı bəndlərinə uyğun olaraq, zərərvurma təhlükəsi yaradan dempinqli və yaxud subsidiyalaşdırılan idxala, həmçinin yerli istehsal sahəsinə ciddi zərər vuran və yaxud ciddi zərərvurma təhlükəsi yaradan artmış idxala qarşı həyata keçirilən tədbirləri, o cümlədən antidempinq, kompensasiya və xüsusi rüsumların formalaşdırılması və tətbiqi qaydalarını tənzimləyir. Sənəd beş fəsil, 31 maddədən ibarətdir.

Müzakirələrdən sonra qanun layihələri səsə qoyularaq qəbul edilib.