Ekspert: İkinci Azərbaycan Beynəlxalq İnvestisiya Forumu ölkəmizin böyük iqtisadi potensialını göstərdi
Bakı, 28 sentyabr, AZƏRTAC
İkinci Azərbaycan Beynəlxalq İnvestisiya Forumunda iştirak edən iş adamları və xarici şirkət nümayəndələri dünya miqyasında böyük biznes strukturlarına malikdir. Dünyanın müxtəlif ölkələrinə və müxtəlif sahələrə irihəcmli sərmayə yatıran bu şirkətlərin Azərbaycana maraq göstərməsi heç də təsadüfi xarakter daşımır.
Bunu AZƏRTAC-a açıqlamasında “Prioritet” Sosial İqtisadi Araşdırmalar Mərkəzi İctimai Birliyinin sədri Zaur İbrahimov deyib.
O bildirib ki, bu gün Azərbaycanın coğrafi mövqeyi və ondan düzgün istifadə nəinki ayrı-ayrı şirkətləri, eləcə də qlobal siyasətdə aparıcı rola malik olan dövlətlərin də diqqətini çəkir: “İlk növbədə onu qeyd etmək lazımdır ki, Trans-Xəzər Beynəlxalq Nəqliyyat Marşrutunun (Orta Dəhliz) Azərbaycan üzərindən keçməsi ölkəmizə qarşı marağı artırıb. Azərbaycan Prezidentinin dəhlizin inkişafı üçün yaratdığı infrastruktur layihələri Avropa ilə Asiya arasındakı ticarət əlaqələrini artırıb. Bu artımdan iri korporasiyalar, şirkətlər, biznes qurumları ilə yanaşı, həm də dövlətlər faydalanır. Bu dəhliz yalnız iqtisadi deyil, eyni zamanda, siyasi xarakterə də malikdir. Azərbaycan ölkədə iqtisadi inkişaf, regionda isə sabitlik siyasəti yürüdərək həm Avropa, həm də Asiya dövlətlərinə iqtisadi inkişaf üçün münbit şərait yaradıb. Bu baxımdan forumda iştirak edən iri şirkətlər Azərbaycana sərmayə yatırmaq niyyətindədirlər. Forum çərçivəsində beynəlxalq investorlar və tərəfdaş şirkətlərlə ümumi dəyəri 10,8 milyard ABŞ dolları olan investisiya layihələrini əhatə edən 23 sənəd imzalanıb ki, bu da təsadüfi xarakter daşımır. Buna imkan yaradan Azərbaycanda həyata keçirilən iqtisadi islahatlar, yatırılan sərmayəyə dövlət zəmanəti, sərbəst iqtisadi zonalarda təklif olunan vergi güzəştləri və digər amillərdir”.
“Bütün bunlarla yanaşı, Azərbaycan dövləti müasir dövrün tələblərini hər zaman nəzərə alır. Bu gün Azərbaycanda qeyri-neft sektorunun inkişafına daha çox diqqət yetirilir. Dənizdə və quruda alternativ və bərpaolunan enerji mənbələrinin işlənməsi və ekoloji təmiz elektrik enerjisi istehsal edilməsi müasir tələblərə cavab verməklə yanaşı, həm də iqtisadi inkişafa təkan verir. Azərbaycan Mərkəzi Asiya ölkələri ilə birlikdə Avropaya yaşıl enerji dəhlizi salmaq və elektrik enerjisi ixrac etmək layihəsi üzərində ciddi iş aparır. Bu, Azərbaycanın həm ixrac, həm də tranzit potensialını ortaya qoyur ki, bu da xarici sərmayədarların diqqətini cəlb edir və sərmayə yatırılmasını sürətləndirir.
Forumun panel iclasında çıxış edən Birləşmiş Ərəb Əmirliklərinin “Masdar” şirkətinin MDB regionu üzrə inkişaf və investisiya şöbəsinin rəhbəri Məryəm Əl Mazrui çıxışında şirkətin Azərbaycanda bərpaolunan enerji layihələrinin inkişafına 1,2 milyard ABŞ dollarından çox sərmayə yatıracağını açıqlayıb. Bu fakt onu deməyə əsas verir ki, Azərbaycanın böyük iqtisadi potensialı var və bura iri həcmdə investisiya yatırmaq istəyən dünya miqyaslı şirkətlər var”, - deyən ekspert bildirib.
Bölmənin digər xəbərləri
