İnvestorlar nə üçün məhz Azərbaycanı seçirlər?
Bakı, 28 sentyabr, AZƏRTAC
Bakıda keçirilən II Azərbaycan Beynəlxalq İnvestisiya Forumu ölkə iqtisadiyyatının şaxələndirilməsi, yeni investisiya imkanlarının təşviqi və beynəlxalq biznes əlaqələrinin genişləndirilməsi baxımından mühüm platformaya çevrilib. Forumda ümumi həcmi 10,8 milyard ABŞ dolları olan investisiya layihələrini əhatə edən 23 sənəd imzalanıb. Bu göstəricilər Azərbaycan Beynəlxalq İnvestisiya Forumuna beynəlxalq investorların və biznes dairələrinin artan marağını nümayiş etdirir.
Bu sözləri AZƏRTAC-a açıqlamasında Milli Məclisin İqtisadi siyasət, sənaye və sahibkarlıq komitəsi sədrinin müavini Azər Badamov söyləyib.
O bildirib ki, forumda ümumi dəyəri təxminən 30 trilyon ABŞ dolları olan aktivləri təmsil edən şirkətlərin iştirakı Azərbaycanın beynəlxalq investorlar üçün cəlbedici tərəfdaş kimi mövqeyinin gücləndiyini göstərir. Bu baxımdan mühüm sual yaranır: investorlar nə üçün məhz Azərbaycanı seçirlər? Bu suala cavab verərkən, ilk növbədə, ölkədə mövcud olan siyasi və makroiqtisadi sabitliyi, müstəqil maliyyə və iqtisadi siyasəti, eləcə də formalaşmış əlverişli investisiya mühitini qeyd etmək lazımdır. Azərbaycan iqtisadiyyatı xarici investisiyalar üçün açıqdır və ölkəmiz investorlarla imzalanmış müqavilə və sazişlər üzrə öhdəliklərin icrasına sadiqliyi ilə seçilir. Bunun bariz nümunələrindən biri 1994-cü ildə imzalanmış “Əsrin müqaviləsi”dir. Müqavilənin icrasının 30 il ərzində ardıcıl şəkildə davam etməsi Azərbaycanın investorlar qarşısında öhdəliklərinə sadiqliyini nümayiş etdirən mühüm amillərdən biridir.
Azərbaycanın iqtisadi və enerji potensialı
“Azərbaycanın investisiya cəlbediciliyini artıran digər mühüm amil ölkənin geniş iqtisadi və enerji potensialıdır. Xüsusilə qeyri-neft sektorunda yeni investisiya imkanları genişdir. Bu baxımdan yaşıl enerji sektorunu xüsusi qeyd etmək lazımdır. Azərbaycanın bərpaolunan enerji potensialı xarici investorlar üçün mühüm imkanlar yaradır. Xüsusilə dənizdə külək enerjisi potensialının 157 giqavat səviyyəsində qiymətləndirilməsi bu sahənin böyük perspektivlərə malik olduğunu göstərir.
Azərbaycan yalnız enerji istehsalının artırılmasına deyil, həm də enerji saxlanc sistemlərinin və nəql infrastrukturunun inkişafına diqqət yetirir. Hazırda enerji saxlanc imkanlarının genişləndirilməsi, eləcə də Xəzər və Qara dəniz vasitəsilə yaşıl enerjinin ötürülməsi ilə bağlı layihələr üzrə iqtisadi-texniki əsaslandırma işləri aparılır. Bu istiqamətlər gələcəkdə investorlar üçün yeni imkanlar yarada bilər.
Yaşıl enerji ilə yanaşı, rəqəmsal iqtisadiyyatın inkişafı da Azərbaycanın investisiya gündəliyində mühüm yer tutur. Süni intellekt texnologiyalarının və data mərkəzlərinin inkişafı daha ucuz, etibarlı və dayanıqlı enerji mənbələrinə tələbatı artırır.
Nəqliyyat, logistika və regional bağlantı layihələri, dağ-mədən sənayesi
Xarici investorların diqqətini cəlb edən digər mühüm sahə nəqliyyat, logistika və regional bağlantı layihələridir. Azərbaycanın Şərq-Qərb və Şimal-Cənub nəqliyyat dəhlizlərinin üzərində yerləşməsi ölkəmizin tranzit potensialını artırır. Cari ildə Azərbaycan ərazisindən daşınan tranzit yüklərin 16 milyon tona çatması və 2030-cu ilədək bu göstəricinin 25 milyon tona çatdırılması ilə bağlı hədəfin müəyyənləşdirilməsi nəqliyyat və logistika infrastrukturuna yeni investisiyaların cəlb edilməsini aktuallaşdırır.
Azərbaycanda investisiya baxımından perspektivli sahələrdən biri də dağ-mədən sənayesidir. Bu istiqamətdə ölkəmizin kifayət qədər böyük potensialı mövcuddur. Dağ-mədən sənayesinin inkişafı ilə bağlı qəbul edilmiş dövlət proqramında müəyyənləşdirilən hədəflərin həyata keçirilməsi bu sahəyə xarici investisiyaların cəlb olunması üçün yeni imkanlar yarada bilər”,-deyə A.Badamov vurğulayıb.
Hədəflər: Süni intellekt və data mərkəzlərinin yaradılması
Deputat əlavə edib ki, süni intellekt və data mərkəzlərinin yaradılması istiqamətində də Azərbaycanın qarşısında mühüm hədəflər dayanır. Bu sahənin inkişafı üçün əsas üstünlüklərdən biri ölkəmizdə formalaşmış insan kapitalıdır.
İnvestisiya baxımından əhəmiyyətli istiqamətlərdən biri də ənənəvi olaraq neft-qaz sektorudur. Azərbaycanın bu sahədə hələ də əhəmiyyətli potensialı mövcuddur. Yeni yataqlar üzrə aparılan kəşfiyyat və tədqiqat işlərinin müsbət nəticə verməsi gələcəkdə neft-qaz sektorunda əlavə investisiya imkanlarının yaranmasına səbəb ola bilər. Forum çərçivəsində bu sahə ilə bağlı yeni sənədlərin imzalanması da sektora marağın davam etdiyini göstərir.
Azərbaycanın siyasi və makroiqtisadi sabitliyi, əlverişli coğrafi mövqeyi, enerji və tranzit potensialı, yaşıl enerji imkanları, insan kapitalı və yeni texnoloji istiqamətləri ölkənin xarici investorlar üçün təqdim etdiyi imkanları daha da genişləndirir. Bu baxımdan qarşıdakı dövrdə Azərbaycan iqtisadiyyatının daha da şaxələndirilməsi, qeyri-neft sektoruna investisiyaların artırılması, yeni texnologiyaların tətbiqi və beynəlxalq bağlantı layihələrinin genişləndirilməsi istiqamətində yeni addımların atılması gözlənilir.
Bölmənin digər xəbərləri
