MİLLİ MƏCLİSİN NÜMAYƏNDƏ HEYƏTİNİN UKRAYNAYA SƏFƏRİ BAŞA ÇATMIŞDIR
Milli Məclisin sədri Murtuz Ələsgərovun başçılığı ilə Azərbaycan parlamenti nümayəndə heyətinin Ukraynaya rəsmi səfəri başa çatmışdır.
Binə hava limanında Milli Məclisin sədrini və onu müşaiyət edən şəxsləri Parlament sədrinin birinci müavini Arif Rəhimzadə, sədrin müavini Gövhər Baxşəliyeva, Ukraynanın Azərbaycandakı səfiri Boris Aleksenko qarşılamışlar.
Murtuz Ələsgərov kütləvi informasiya vasitələri nümayəndələrinin suallaırna cavab verərək demişdir ki, Ukrayna parlamentinin sədri Vladimir Litvinin dəvəti ilə Milli Məclisin nümayəndə heyətinin bu ölkəyə ilk səfərinin yekunları çox uğurludur. Səfər zamanı Ukrayna Prezidenti Leonid Kuçma, Ali Radanın sədri Vladimir Litvin və baş nazir Viktor Yanukovic ilə görüşlər keçirilmiş Azərbaycan-Ukrayna münasibətlərinin inkişaf perspektivləri müzakirə edilmişdir. Kiyev Universitetində və Heydər Əliyev adına Sosial Elmlər və Beynəlxalq Münasibətlər İnstitutunda, Ukraynadakı Azərbaycan diasporunun üzvləri ilə keçirilən görüşlər də yaddaqalan olmuşdur.
Bölmənin digər xəbərləri
