Milli Məclisin plenar iclasında 40 məsələyə baxılıb
Bakı, 18 dekabr, AZƏRTAC
Dekabrın 18-də Azərbaycan Respublikası Milli Məclisinin növbəti plenar iclası keçirilib.
AZƏRTAC xəbər verir ki, iclası açan Milli Məclisin sədri Oqtay Əsədov gündəliyi elan edib.
Əvvəlcə cari məsələlərə baxılıb.
Amerika Birləşmiş Ştatlarının Helsinki Komissiyasının sədri, konqresmen Kris Smitin Azərbaycanla bağlı təqdim etdiyi qərəzli qanun layihəsinə münasibət bildirən Oqtay Əsədov bəzi kütləvi informasiya vasitələrində bu məsələnin şişirdilməsinin düzgün olmadığını deyib. O, Kris Smitin adi bir konqresmen olduğunu, bu layihənin Konqresdən keçməyəcəyini bildirib. Milli Məclisin sədri ABŞ Konqresində Azərbaycanın dostlarının da olduğunu vurğulayıb. Oqtay Əsədov K.Smitin erməni lobbisinin təsiri altında olduğunu diqqətə çatdırıb. Sədr deyib ki, erməni diasporunun radikal rəhbərlərindən biri Aram Hamparyan öz Twitter səhifəsində K.Smitlə Konqresdə çəkdirdiyi şəkli yerləşdirib və yazıb ki, onun işini dəstəkləmək üçün bu görüşü keçirir. Bu, əslində K.Smitin kim olduğunu açıq-aydın göstərir.
Oqtay Əsədov konqresmenin bu addımının indiki vaxtda atılmasının səbəbini də diqqətə çatdırıb. Bildirib ki, hər il olduğu kimi, bu il də Dünya Azərbaycanlılarının Həmrəyliyi Günü ilə əlaqədar Azərbaycan Prezidenti tərəfindən əfv Fərmanının imzalanması gözlənilir. Onlar əfv Fərmanı imzalanandan sonra demək istəyirlər ki, guya biz təsir etdik və buna görə də bizim dediyimiz adamlar əfv edildi. İkincisi, istəyirlər ki, biz bu məsələyə çox böyük reaksiya verək. Onlar bu yolla Azərbaycanı təxribata çəkmək istəyirlər.
Milli Məclisin beynəlxalq münasibətlər və parlamentlərarası əlaqələr komitəsinin sədri Səməd Seyidov qeyd edib ki, dekabrın 16-da K.Smit çıxışında deyib ki, bu gün Avropa Şurasının baş katibi Torbyorn Yaqland Azərbaycana araşdırıcı komissiya göndərmək barədə qərar qəbul edib və biz onunla əlbir işləməliyik. Bu, göstərir ki, onun təqdim etdiyi qanun layihəsi də əvvəlcədən planlaşdırılıb. Bu layihə ermənipərəst, antiazərbaycan qüvvələrin ölkəmizə qarşı birgə təxribat əməlidir. Lakin onu da bilmək lazımdır ki, bu, yalnız bir qrup şəxsin mövqeyidir. K.Smitin təmsil olunduğu Helsinki Komissiyası Konqresə aid qurum deyil. Bu layihənin qəbul olunması ehtimalı sıfıra bərabərdir.
Çıxış edən digər deputatlar da bu layihənin antiazərbaycan xarakteri daşıdığını və qəbuledilməz olduğunu bildiriblər. Qeyd edilib ki, layihənin ABŞ-dakı erməni lobbi dairələri tərəfindən hazırlanması şübhə doğurmur. Əslində belə bir qanun layihəsi Ermənistanla bağlı hazırlanmalıdır. Çünki Ermənistanda insan haqları mütəmadi olaraq pozulur. Bu gün Ermənistana rəhbərlik edən kriminal rejim nəinki Azərbaycan vətəndaşlarına qarşı soyqırımı aktının birbaşa iştirakçısı olub, eyni zamanda, öz ölkəsinin vətəndaşlarının da qəniminə çevrilib.
Daha sonra gündəlikdəki qanun layihələrinin müzakirəsinə başlanılıb.
Azərbaycan ilə Çexiya arasında strateji tərəfdaşlıq haqqında Birgə Bəyannamənin təsdiq edilməsi barədə, Azərbaycan Hökuməti ilə Vyetnam Hökuməti arasında hava əlaqəsinə dair Sazişin təsdiq olunması haqqında, Azərbaycan və Vyetnam hökumətləri arasında gömrük işi sahəsində əməkdaşlıq və qarşılıqlı yardım haqqında Sazişin təsdiq edilməsinə dair, Azərbaycan və San Marino hökumətləri arasında sərmayələrin təşviqi və qarşılıqlı qorunması haqqında Sazişin təsdiq edilməsi barədə, Azərbaycan ilə Argentina arasında turizm sahəsində əməkdaşlığa dair Sazişin təsdiq olunması haqqında qanun layihələrinə baxılıb.
Bundan başqa, Ticarət Gəmiçiliyi Məcəlləsində, “Dövlət rüsumu haqqında”, “Təbii inhisarlar haqqında” və “Gömrük tarifi haqqında” qanunlarda dəyişikliklər edilməsi barədə qanun layihələri müzakirə edilib.
Sonra Azərbaycan Respublikasının 1994-cü il 23 sentyabr tarixli 886 nömrəli Qanunu ilə təsdiq edilmiş “Azərbaycan Respublikası Silahlı Qüvvələrinin Qarnizon və qarovul xidmətləri nizamnaməsi”ndə dəyişikliklər edilməsi haqqında, Azərbaycan Respublikasının 1994-cü il 23 sentyabr tarixli 887 nömrəli Qanunu ilə təsdiq edilmiş “Azərbaycan Respublikası Silahlı Qüvvələrinin Daxili Xidmət Nizamnaməsi”ndə dəyişikliklər edilməsi barədə, Azərbaycan Respublikasının 1997-ci il 3 oktyabr tarixli 337-IQ nömrəli Qanunu ilə təsdiq edilmiş “Hərbi xidmətkeçmə haqqında Əsasnamə”də, “Sərhəd qoşunları haqqında”, “Dövlət sərhədi haqqında” qanunlarda dəyişikliklərlə bağlı qanun layihələrinə baxılıb.
“Yerin təki haqqında”, “Hidrotexniki qurğuların təhlükəsizliyi haqqında”, “Bələdiyyələrin su təsərrüfatı haqqında”, “Torpaqların dövlət ehtiyacları üçün alınması haqqında” qanunlarda dəyişikliklər edilməsi barədə, “Azərbaycan Respublikası Milli Məclisinin komitələri haqqında”, “Notariat haqqında”, “Xidməti və mülki silah haqqında” qanunlarda dəyişikliklər edilməsinə dair, Azərbaycan Respublikasının 1996-cı il 17 may tarixli 74-IQ nömrəli Qanunu ilə təsdiq edilmiş “Azərbaycan Respublikası Milli Məclisinin Daxili Nizamnaməsi”ndə dəyişikliklər edilməsi haqqında” qanun layihələri də nəzərdə keçirilib.
Deputatlar daha sonra İnzibati Xətalar, İnzibati Prosessual məcəllələrində, Mülki Məcəllədə, Torpaq Məcəlləsində dəyişikliklər edilməsi haqqında, “Tütün və tütün məmulatı haqqında”, “Üzümçülük və şərabçılıq haqqında”, “Pambıqçılıq haqqında” qanunlarda dəyişikliklər olunması barədə qanun layihələrini müzakirə ediblər.
İclasda “Kənd təsərrüfatı kooperasiyası haqqında” qanun layihəsinə də baxılıb. Məlumat verilib ki, bu qanun layihəsi kənd təsərrüfatı kooperasiyasının formalaşmasının və inkişafının, kənd təsərrüfatı kooperativlərinin təşkilinin və fəaliyyətinin hüquqi, iqtisadi əsaslarını müəyyən edir.
Deputatlar, həmçinin “İcbari sığortalar haqqında”, “İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında”, “Şah İsmayıl” ordeninin statusunun və təsvirinin təsdiq edilməsi haqqında” və “Azərbaycanın Milli Qəhrəmanının xüsusi fərqlənmə nişanını təsis etmək haqqında” qanunlarda dəyişikliklər edilməsi barədə qanun layihələrinə, Azərbaycan Respublikası apellyasiya məhkəmələri hakimlərinin təyin edilməsi haqqında qanun layihəsinə baxıblar.
Müzakirələrdən sonra qanun layihələri səsə qoyularaq qəbul edilib.
Bölmənin digər xəbərləri
