MİLLİ QEYRİ-HÖKUMƏT TƏŞKİLATLARI FORUMUNUN VI QURULTAYINA
Sizi Milli Qeyri-Hökumət Təşkilatları Forumunun növbəti qurultayının keçirilməsi münasibətilə təbrik edirəm!
Azərbaycan Respublikasında hüquqi dövlət və vətəndaş cəmiyyəti quruculuğu artıq dönməz xarakter almışdır. Müasir həyatımızın ayrılmaz tərkib hissəsinə çevrilmiş bu proseslər rəsmi dövlət orqanları ilə yanaşı, ictimai təsisatların, qeyri-hökumət təşkilatlarının da ardıcıl fəaliyyət göstərməsini tələb edir. İctimai təşəbbüslərin reallaşmasında əhəmiyyətli rol oynayan qeyri-hökumət təşkilatları həm də dövlət-vətəndaş münasibətlərinin tənzimlənməsinə, qarşılıqlı əlaqələrin və əməkdaşlığın qurulmasına, demokratik proseslərin inkişafına, sosial, iqtisadi və humanitar məsələlərin həllinə sanballı töhfə verirlər.
Azərbaycan müstəqillik əldə etdikdən sonra ölkəmizdə həyata keçirilən hüquqi dövlət quruculuğu prosesləri ictimai sektorun inkişafı üçün geniş imkanlar açmışdır. Bu sahə üzrə qanunvericiliyin təkmilləşdirilməsi, demokratik dəyərlərin cəmiyyətimizdə getdikcə dərin kök salması vətəndaş təşəbbüskarlığının bilavasitə ifadəsi olan qeyri-hökumət təşkilatlarının geniş şəbəkəsinin formalaşmasına təkan verdi.
Ölkə həyatının müxtəlif sahələrini əhatə edən yüzlərlə qeyri-hökumət təşkilatının yaranması və cəmiyyətimizdəki dinamik proseslərə qoşulması onların fəaliyyətinin müəyyən koordinasiyasını, dövlət orqanları və beynəlxalq qurumlarla daha səmərəli əlaqələrin qurulmasını zəruri edirdi. 1999-cu ildə Milli Qeyri-Hökumət Təşkilatları Forumunun təsis olunması bu boşluğu xeyli dərəcədə aradan qaldırdı.
Yarandığı vaxtdan etibarən Forum müvafiq dövlət orqanları ilə sıx əməkdaşlıq edərək, ictimai təşkilatların fəaliyyətinin normativ-hüquqi bazasının təkmilləşdirilməsi, onların inkişafı üçün əlverişli mühitin yaradılması istiqamətində ardıcıl iş aparmış, bu sahənin fəaliyyətini tənzimləyən qanun layihələrinin hazırlanmasında yaxından iştirak etmişdir.
Bu gün Milli Qeyri-Hökumət Təşkilatları Forumu cəmiyyətin tərəqqisinə yönələn müxtəlif proqram və layihələrin reallaşmasında, insanların maarifləndirilməsində, ümummilli məsələlərlə bağlı ictimai fikrin formalaşmasında əhəmiyyətli rol oynayır. Forum müxtəlif sosial, mədəni-kütləvi tədbirlərin həyata keçirilməsində, dövlət orqanları ilə ictimai təşkilatlar arasında əməkdaşlığın qurulmasında, vətəndaş cəmiyyəti təsisatlarının möhkəmlənməsində ciddi səylər göstərir. Ölkəmizin daxili həyatındakı fəaliyyəti ilə yanaşı, Azərbaycan həqiqətlərinin və ümummilli problemlərin dünya ictimaiyyətinə çatdırılmasında da təqdirəlayiq işlər görür.
Milli Qeyri-Hökumət Təşkilatları Forumunun vətəndaş cəmiyyətinin inkişafı sahəsində həyata keçirdiyi tədbirlər onun ictimai sektordakı nüfuzunu artırmış, mövqelərini möhkəmləndirmiş, ictimai birliklərin, beynəlxalq qurumların və dövlət orqanlarının etibarlı tərəfdaşına çevirmişdir.
Müasir dövrdə respublikamızın qarşısında duran vəzifələrin həll edilməsində qeyri-hökumət təşkilatlarının rolunu lazımınca qiymətləndirən Azərbaycan dövləti onların potensialının artırılmasını və fəaliyyətinin gücləndirilməsini zəruri hesab edir, əsaslandırılmış təklif və təşəbbüslərinə dəstək verir.
Ümid edirəm ki, ölkəmizdə gedən demokratik proseslər, inkişaf və tərəqqi qeyri-hökumət təşkilatlarının potensialından daha səmərəli istifadə olunmasına imkan yaradacaq, ictimai təşkilatların demokratik cəmiyyət quruculuğundakı rolunu artıracaqdır.
Növbəti ali məclisinizin keçirilməsi münasibətilə sizi bir daha təbrik edir, qurultayın işinə uğurlar arzulayıram!
İlham Əliyev
Azərbaycan Respublikasının Prezidenti
Bakı şəhəri, 25 aprel 2006-cı il.
Bölmənin digər xəbərləri
