MİLLİ TƏHLÜKƏSİZLİK NAZİRİ BEYNƏLXALQ SAMMİTDƏ İŞTİRAK ETMİŞDİR

19.10.2004 [21:08]
Çap et
A⁺ A^-

Milli Təhlükəsizlik Nazirliyinin İctimai əlaqələr mərkəzindən AZƏRTAC-a bildirmişlər ki, Azərbaycan Respublikasının milli təhlükəsizlik naziri general-mayor Eldar Mahmudovun rəhbərlik etdiyi nümayəndə heyəti “Monako Ümumdünya Sammiti”nin sədri cənab Jan Pol Karteronun dəvəti ilə Monakoda Mütəşəkkil cinayətkarlıqla mübarizə üzrə 6-cı Beynəlxalq sammitdə iştirak etmişdir.

Dünyanın 60-a yaxın ölkəsinin və bir çox nüfuzlu beynəlxalq təşkilatların nümayəndələrinin təmsil olunduqları sammitdə transmilli cinayətkarlıqla, xüsusilə də getdikcə daha təhlükəli xarakter və geniş miqyas almaqda olan beynəlxalq terrorçuluqla, habelə insan alveri, narkotiklərin qanunsuz dövriyyəsi, çirkli pulların yuyulması və mütəşəkkil cinayətkarlığın digər növləri ilə mübarizə sahəsində əməkdaşlığın yeni reallıqlara uyğun təkmilləşdirilməsi və inkişaf etdirilməsi məsələləri əsas müzakirə mövzusu olmuşdur.

Sammitin beynəlxalq terrorçuluğa həsr olunmuş geniş və əsas sessiyasında çıxış edən nazir Eldar Mahmudov erməni silahlı separatizmi və terrorçuluğunun təhlükəsi və fəsadlarından, nəzarət olunmayan ərazilərlə bağlı problemlərdən, ümumən Azərbaycanda terrorçuluqla mübarizə sahəsində dövlət səviyyəsində görülən işlərdən, ölkənin xüsusi xidmət orqanlarının fəaliyyətindən danışmış, bu istiqamətdə beynəlxalq əməkdaşlığın daha məqsədyönlü şəkildə gücləndirilməsinin vacibliyini vurğulamışdır.

Eldar Mahmudov sammitin gedişində çoxsaylı ikitərəfli görüşlər keçirmiş, gələcək əməkdaşlığın inkişaf perspektivləri haqqında müzakirələr aparmışdır.