Millinin voleybolçusu: İnanıram ki, bu il bizim üçün uğurlu olacaq
Bakı, 19 may, AZƏRTAC
Artıq Bakı toplanışımız başa çatmaq üzrədir. Hazırlıqlar plan üzrə davam edir.
AZƏRTAC xəbər verir ki, bu sözləri kişi voleybolçulardan ibarət Azərbaycan millisinin üzvü Vüqar Bayramov Avropa Liqasına hazırlıq barədə jurnalistlərə açıqlamasında deyib.
O, növbəti mərhələdə Belarusda birhəftəlik toplanış keçəcəklərini bildirib: "Orada yoxlama oyunlarımız da olacaq. İyunun 2-də Türkiyənin Ankara şəhərində yerli yığma ilə birgə məşqlərimiz təşkil ediləcək. Klub mövsümü yeni başa çatdığı üçün oyunçularda yorğunluq hiss olunur. Amma hazırlıq yaxşı gedir. Ümid edirəm ki, bu il bizim üçün uğurlu olacaq".
Qeyd edək ki, kişilərdən ibarət Azərbaycan millisi Avropa Liqasına iyunun 6-da İsveçdə start verəcək. Komanda ilk mərhələdə Yunanıstan və ev sahibi komanda ilə qarşılaşacaq. Növbəti mərhələdə Rumıniya və İspaniya ilə oyunlar keçiriləcək. Azərbaycanda təşkil olunacaq mərhələdə isə millimiz Macarıstan və Portuqaliya ilə münasibətlərə aydınlıq gətirəcək.
Müxbir - Cavid Əliyev
Bölmənin digər xəbərləri
