Mingəçevir, 22 may, Şahnəzər Bəşirov, AZƏRTAC

Sovet dövründə dövlət fonduna məxsus mənzillər artıq insanların mülkiyyətinə verilib. Bu gün mənzil sahibləri binadakı mənzilləri ilə bərabər, ümumi istifadədə olan hissələrin (lift, pilləkən qəfəsləri, dam örtüyü, zirzəmi, həyət və s.) saxlanması üçün də məsuliyyət daşıyırlar.

AZƏRTAC-ın bölgə müxbiri xəbər verir ki, bu fikirləri İqtisadiyyat Nazirliyinin mənzil-kommunal siyasəti şöbəsinin müdir müavini Fərrux Dadaşov Mingəçevirdəki çoxmənzilli yaşayış binalarının məhəllə komitələrinin nümayəndələri ilə keçirdiyi görüşlər zamanı səsləndirib.

Görüşlər Mingəçevir Valideynlər Assosiasiyası İctimai Birliyinin Azərbaycan Respublikası Prezidenti yanında QHT-lərə Dövlət Dəstəyi Şurasının maliyyə yardımı ilə Mingəçevirdə həyata keçirdiyi layihə çərçivəsində baş tutub.

Fərrux Dadaşov bildirib ki, dövlətimizin başçısı İlham Əliyev köhnəlmiş binaların əsaslı təmiri, xüsusən dam örtüklərinin dəyişdirilməsi üçün Prezidentin ehtiyat fondundan mütəmadi olaraq vəsait ayırır. Təkcə son 2 il ərzində ayrılan 8 milyon manat vəsait hesabına Mingəçevirdə 160 binanın dam örtüyü dəyişdirilib: “Dövlət çoxmənzilli binaların saxlanmasında bundan sonra da köməyini əsirgəməyəcək. Ancaq mənzil mülkiyyətçiləri başa düşməlidirlər ki, onlar özəlləşdirdikləri mənzilə görə binalarının saxlanmasına cavabdehdirlər. Bunu müvafiq qanunvericilik, yəni 2009-cu ildən qüvvədə olan Mənzil Məcəlləsi tələb edir”.

Mingəçevirdəki məhəllə komitələrinin nümayəndələrinə məlumat verilib ki, çoxmənzilli yaşayış binalarının idarə olunması üçün ölkəmizdə Mənzil Mülkiyyətçilərinin Müştərək cəmiyyətləri (MMMC) yaradılır. İndiyədək Bakı şəhərində 80 belə qurum yaradılıb. Regionlarda ilk dəfə olaraq belə MMMC-lərin Mingəçevir şəhərində yaradılması üçün hazırda işlər görülür, maarifləndirmə görüşləri keçirilir.

Tədbirdə Bakının “Xətai-3” MMMC-nin idarə heyətinin sədri Mehman Nağıyev görüş iştirakçılarına bu sahədəki təcrübəsi barədə danışıb. Bildirib ki, MMMC 4 il əvvəl yaradılıb və bununla da komendant özbaşınalığından canları qurtarıb: “Binanı tikən şirkət onun idarəetməsini də əlində saxlamışdı və məqsədi heç bir xidmət göstərmədən mənzil mülkiyyətçilərindən hər ay pul toplamaq idi. Biz qanuna uyğun şəkildə yığıncağımızı keçirdik, yeni idarəetmə qurumunu yaratdıq, aramızdan İdarə heyətini və Nəzarət Təftiş Komissiyasının üzvlərini seçdik. Bir faktı deyim ki, 18 mərtəbəli binanın lifti yarıtmaz, təhlükəli vəziyyətdə idi. MMMC adından Fövqəladə Hallar Nazirliyinə müraciət etdik və lift dəyişdirildi. Başqa problemlərin də həllinə nail olmuşuq. Yığıncağımızın qərarı ilə tariflər müəyyənləşdirmişik və fond yaratmışıq. Həm də müxtəlif qurumlar kömək göstərirlər”.

Görüşlərdə “İqtisadi Təşəbbüslərə Yardım” İctimai Birliyinin eksperti Samir Əliyev mülkiyyətçilərin mənzil hüquqları və onun əsasları, çoxmənzilli binanın sahə mülkiyyətçilərinin ümumi əmlakı, sahə mülkiyyətçilərinin çoxmənzilli binanın idarəetmə üsulunu seçməsi, MMMC-lərin yaradılması ilə bağlı toplantıların keçirilmə qaydası və sənədlərin hazırlanması, MMMC-lərlə sahə mülkiyyətçiləri arasında yaranan anlaşılmazlıqlar və onların həlli proseslərinin qanunla necə tənzimlənməsi barədə geniş məlumat verib.

Müzakirələrdə Mingəçevir Valideynlər Assosiasiyası İctimai Birliyinin və layihənin rəhbəri Fərman Nəbiyev, Mingəçevir Bələdiyyəsinin komissiya sədri və layihə rəhbərinin köməkçisi Zahid Qasımlı çıxış edərək çoxmənzilli binanın saxlanma xərcləri və Mənzil Mülkiyyətçiləri Müştərək Cəmiyyətinin üstünlüklərindən, yerli bələdiyyələrin mənzil fondunun idarə edilməsində məsuliyyəti və rolundan bəhs edib.

Görüşlərdə sakinlərin çoxsaylı sualları cavablandırılıb.