Misir Liviya ilə sərhədlərini gücləndirir
Qahirə, 6 iyul, AZƏRTAC
Misir Prezidenti Əbdülfəttah əl-Sisi ordu komandanları ilə keçirdiyi müşavirədə ölkənin Liviya ilə qərb sərhədlərinin gücləndirilməsi, rabitə texnologiyaları vasitəsilə terrorçuların səhra boyu keçidinin qarşısının alınması barədə göstəriş verib.
AZƏRTAC Misir Prezidentinin mətbuat xidmətinə istinadla xəbər verir ki, müşavirədə Silahlı Qüvvələrin rabitə korpusuna daha müasir texnologiyalardan, Misirin “Tiba 1” peykinin mobil və vizual imkanlarından istifadə etməklə sərhədyanı ərazilərdə təhlükəsizlik planını hazırlayıb təqdim etmək tapşırılıb. Qeyd olunub ki, Liviyada silahlı münaqişən davam etdiyi bir şəraitdə daha da fəallaşan terrorçu qruplaşmaların ölkə ərazisinə daxil olmasının qarışı qətiyyətlə alınmalıdır.
Misir Prezidenti fövqəladə hallar və ictimai təhlükəsizlik üzrə vahid strateji layihənin əhəmiyyətini də vurğulayıb. O qeyd edib ki, ölkə daxilində ictimai-siyasi sabitliyin qorunması, habelə fövqəladə halların qarşısının alınması və nəticələrinin aradan qaldırılması üzrə fəaliyyətlər də müasir texnoloji vasitələrlə həyata keçirilməlidir. Əbdülfəttah əl-Sisi, həmçinin dövlət aparatı və hökumət strukturlarının texnologiyanın ən son nailiyyətləri ilə təmin edilməsi barədə göstəriş verib.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
