Misir Prezidenti karantin xəstəxanalarında infeksiya əleyhinə nəzarətin gücləndirilməsi barədə tapşırıq verib
Qahirə, 11 iyun, AZƏRTAC
Misir Prezidenti Əbdülfəttah əl-Sisi Baş Nazir Mustafa Mədbuli və Səhiyyə naziri Halə Zayidə karantin xəstəxanalarında infeksiya əleyhinə nəzarətin gücləndirilməsi və tibb personalının təhlükəsizliyinin təmin edilməsi barədə tapşırıq verib.
AZƏRTAC xəbər verir ki, Misirin dövlət başçısı ölkədə 58 həkimin yeni növ koronavirusdan dünyasını dəyişməsi ilə əlaqədar hökumətin iclasını keçirib. O, Səhiyyə nazirinə karantin xəstəxanaları və özəl klinikalarla müntəzəm iş aparılması üzrə daha mükəmməl mexanizmin yaradılması barədə göstəriş verib.
Bu arada, Misirin Səhiyyə Nazirliyi iyunun 10-da yeni növ koronavirus pandemiyası ilə bağlı son vəziyyəti açıqlayıb. Nazirliyin mətbuat katibi Xalid Meqahed bildirib ki, son sutka ərzində COVID-19 virusuna 1455 nəfər yoluxub və beləliklə, ölkədə yoluxma halları 38 284 olub. O əlavə edib ki, Misirdə daha 36 nəfər yeni növ koronavirusun qurbanı olub, həyatını itirən pasiyentlərin ümumi sayı isə 1342 nəfərdir. Bundan başqa, karantin xəstəxanalarında müalicə olunan 503 pasiyent sağalıb və xəstəlikdən şəfa tapanların sayı 10 289 nəfərə çatıb.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
