Moldovada Zəfər Günü qeyd edilib VİDEO
Kişineu, 7 noyabr, AZƏRTAC
Azərbaycanın Moldovadakı səfirliyinin təşkilatçılığı ilə 8 Noyabr - Zəfər Günü və 9 Noyabr - Dövlət Bayrağı Günü münasibətilə tədbir keçirilib.
AZƏRTAC xəbər verir ki, tədbirdə xarici ölkələrin səfirləri, hökumət rəsmiləri, tanınmış ictimai-siyasi xadimlər, soydaşlarımız iştirak ediblər.
Mərasimin açılışında Azərbaycanın və Moldovanın Dövlət himnləri səsləndirilib və ölkəmizin ərazi bütövlüyü uğrunda şəhid olanların xatirəsi bir dəqiqəlik sükutla yad olunub.
Səfir Ülvi Baxşəliyev bildirib ki, Müzəffər Ali Baş Komandan İlham Əliyevin rəhbərliyi altında şanlı Ordumuzun əldə etdiyi bu böyük Qələbə Azərbaycan tarixinə qızıl hərflərlə yazılıb.
“2020-ci il 44 günlük Vətən müharibəsində tarixi Zəfərimiz, həmçinin 2023-cü ildə qətiyyətli antiterror tədbirləri nəticəsində Azərbaycan torpaqlarının 30 illik işğalına son qoyuldu. Bu tarixi nailiyyət yalnız Azərbaycanın milli iradəsinin və əzmkar mübarizəsinin təntənəsi deyil, eyni zamanda, bölgədə ədalətin, sülhün və sabitliyin bərqərar olunmasına mühüm töhfədir. 44 günlük Vətən müharibəsi nəticəsində Azərbaycanın öz ərazi bütövlüyünü, ədaləti və beynəlxalq hüququ bərpa edib”,- deyə səfir əlavə edib.
Səfir vurğulayıb ki, ölkə başçımızın rəhbərliyi altında atılmış addımlar Azərbaycanın irəli sürdüyü sülh gündəliyini bir daha təsdiq etdi.
Ülvi Baxşəliyevin sözlərinə görə, hazırda “Böyük Qayıdış” proqramı çərçivəsində işğaldan azad edilmiş ərazilərdə uğurla aparılan genişmiqyaslı bərpa və quruculuq işləri regionun simasını köklü şəkildə dəyişir.
Moldova Xarici İşlər Nazirliyinin dövlət katibi Sergey Mihov Azərbaycanın Zəfər Günü ilə bağlı təbriklərini çatdıraraq bildirib ki, Azərbaycana sülhün, sabitliyin və regional inkişafın təşviqi istiqamətində mühüm səylər göstərir.
“Moldova Azərbaycanın suverenliyini və ərazi bütövlüyünü ardıcıl olaraq dəstəkləyib və dəstəkləməkdə davam edir. Hər iki ölkə arasında münasibətlər səmimi dostluq və fəal əməkdaşlıq ruhunda inkişaf edir. Bu baxımdan biz dövlət başçılarımızın görüşlərini, Xarici İşlər Nazirliyi və digər aidiyyəti nazirliklər səviyyəsində çoxsaylı səfərləri, idarələrarası siyasi məsləhətləşmələri qeyd edirik. Biz ikitərəfli gündəliyin gücləndirilməsinə yönəlmiş müzakirələrin irəliləməsində maraqlı olduğumuzu bildiririk. Ümid edirik ki, ikitərəfli səfərlər praktikasını eyni sürətlə, o cümlədən ən yüksək səviyyədə davam etdirəcəyik”, - deyə Sergey Mihov əlavə edib.
XİN rəsmisi bildirib ki, iki ölkə iqtisadi sahədə səmərəli əməkdaşlıq edir və ölkəmizin enerji təchizatı mənbələrinin və marşrutlarının şaxələndirilməsində Azərbaycan Respublikasının töhfəsinə ümid edir.
Moldovada yaşayan soydaşlarımızın Zəfərimizi qürurla yaşadığını qeyd edən Moldova Azərbaycanlıları Konqresinin sədri Elçin Bayramov isə çıxışında bildirib ki, Zəfər Günü Azərbaycan dövlətinin gücünün, birliyinin simvoluna çevrilib. Vətən müharibəsində Azərbaycan xalqının və əzəmətli Ordusunun qazandığı Zəfər dövlətçilik tariximizə qızıl hərflərlə həkk olunub. Moldovada yaşayan azərbaycanlılar da Zəfər Gününü təntənəli şəkildə qeyd edirlər.
Çıxışlardan sonra şanlı Zəfərimizə həsr olunmuş videoçarx nümayiş etdirilib. UNESCO-nun Beynəlxalq Plastik Sənətlər Assosiasiyasının üzvü olan azərbaycanlı rəssam Nərminə Nəcəfovanın və digər tanınmış Azərbaycan rəssamlarının əsərlərindən ibarət “Biz qayıtdıq” mövzusunda rəsm sərgisinə və şanlı Zəfərimizə aid fotosərgiyə baxış keçirilib.
Emil Hüseynli
AZƏRTAC-ın xüsusi müxbiri
Kişineu
Bölmənin digər xəbərləri
