Monteneqro Skadar gölünün UNESCO siyahısına salınmasını istəyir
Podqoritsa, 22 oktyabr, AZƏRTAC
Monteneqro tərəfi Skadar gölünün UNESCO-nun biosfer qoruqları siyahısına daxil edilməsini istəyir.
AZƏRTAC xəbər verir ki, ölkənin Ekologiya, Davamlı İnkişaf və Şimal İnkişaf Nazirliyi Skadar gölü hövzəsinin dünya biosfer ehtiyatları siyahısına daxil edilməsi üçün rəsmi olaraq namizədliyini irəli sürüb. Nazirliyə görə, bu, həyata keçirilərsə, yerli icmanı gücləndirəcək və bölgə üçün çoxsaylı imkanlar yaradacaq.
Həm Monteneqro, həm də Albaniya ərazilərində yerləşən Skadar gölü Balkan yarımadasının ən iri gölüdür. Bu göl turistləri mənzərəli sahilləri, zəngin flora və faunası, tərtəmiz suyu və dövlət tərəfindən mühafizə olunan, insan əli dəyməmiş təbiət əraziləri ilə cəlb edir.
Qeyd edək ki, dünyada 748 biosfer qoruğu var və onlar 134 ölkədə yerləşir. Son iki ildə bu şəbəkəyə 20-dən çox yeni qoruq əlavə edilib.
Nihad Budaqov
AZƏRTAC-ın xüsusi müxbiri
Podqoritsa
Bölmənin digər xəbərləri
