Monteneqroda Berlin Prosesi çərçivəsində XIII Sammit keçirilib
Berlin, 23 oktyabr, AZƏRTAC
Berlin Prosesi çərçivəsində Monteneqroda Qərbi Balkan ölkələrinin Avropa İttifaqına (Aİ) inteqrasiyası və regional əməkdaşlığın gücləndirilməsinə həsr olunan XIII Sammit keçirilib.
AZƏRTAC xəbər verir ki, tədbirdə Almaniya Kansleri Fridrix Merts, Aİ və Qərbi Balkan ölkələrinin nümayəndələri iştirak ediblər. Görüşdə iqtisadi və siyasi əlaqələrin genişləndirilməsi, həmçinin iqtisadiyyat və təhlükəsizlik sahələrində əməkdaşlığın inkişafı müzakirə olunub.
Kansler Fridrix Merts Qərbi Balkan ölkələrinin Avropanın ayrılmaz hissəsi olduğunu vurğulayaraq, Aİ-nin genişlənməsinin strateji əhəmiyyətini qeyd edib. O, Monteneqronun İttifaqa üzvlük istiqamətində irəliləyişini müsbət qiymətləndirib və digər ölkələrin də bu yolu davam etdirəcəyinə əminliyini ifadə edib.
Sammitdə Qərbi Balkan dövlətlərinin Avropaya inteqrasiyasının sürətləndirilməsi, regional əməkdaşlığın dərinləşdirilməsi və ortaq təşəbbüslərin inkişafı diqqət mərkəzində olub.
Qeyd edək ki, 2014-cü ildə Almaniyanın təşəbbüsü ilə yaradılan Berlin Prosesi Qərbi Balkan ölkələri arasında əməkdaşlığın möhkəmləndirilməsinə və onların Aİ-yə inteqrasiyasına dəstək məqsədi daşıyır. Sammitdə növbəti il üçün prosesə sədrlik Avstriyaya həvalə olunub.
Bölmənin digər xəbərləri
