MÜASİR AZƏRBAYCAN GƏNCLİYİ ÜMUMMİLLİ LİDER HEYDƏR ƏLİYEVİN İDEALLARINA SADİQDİR
AZƏRTAC-ın müxbiri xəbər verir ki, bu fikir Azərbaycan Respublikası Gənclər və İdman Nazirliyi yaradılmasının 13 illiyi münasibətilə İsmayıllıdakı “Gülüstan” şadlıq sarayında keçirilmiş “Müstəqil Azərbaycanın gələcəyi gənclərdir” adlı ədəbi-bədii tədbirdə səsləndirilmişdir.
Rayon gənclər və idman idarəsinin rəisi Vüqar Muradəliyev qeyd etmişdir ki, ötən əsrin 90-cı illərinin əvvəllərində respublikamızın ictimai-siyasi həyatında hökm sürən qeyri-sabitlik, hakimiyyət uğrunda gedən mübarizələr, ölkədə yaranmış xaos gənclərimiz və idmançılarımız arasında bədbinliyə səbəb olmuşdu. Gənclər və idmançılar problemlər qarşısında aciz qalmışdılar. 1993-cü ildə xalqın tələbi ilə dövlət rəhbərliyinə gəlmiş Heydər Əliyevin bir il sonra - 1994-cü il iyulun 26-da imzaladığı tarixi Fərmanla gəncliyimizin və idman potensialımızın daha düzgün inkişafına təkan verildi. Bu, Gənclər və İdman Nazirliyinin yaradılması barədə tarixi sənəd idi.
Natiq, eləcə də digər çıxış edənlər ulu öndərin əsasını qoyduğu dövlət gənclər siyasətinin uğurlu nəticələrindən, həmin siyasətin Prezident İlham Əliyev tərəfindən səylə davam etdirilməsindən, nazirliyin fəaliyyətindən danışmışlar. Bildirilmişdir ki, bu gün Azərbaycan gəncləri öz intellekti, böyük idman uğurları ilə beynəlxalq aləmdə tanınır, təqdir edilir.
Tədbirdə İsmayıllı Rayon İcra Hakimiyyətinin başçısı Nizami Ələkbərov Gənclər və İdman Nazirliyi yaradılmasının 13 illiyi münasibətilə gəncləri, idmançıları təbrik etmiş, 2007-ci ilin gənclər ili elan edilməsini Prezident İlham Əliyevin gənc nəslə göstərdiyi diqqət və qayğının təcəssümü olduğunu demişdir.
Bayram tədbiri axşam Heydər Əliyev adına mədəniyyət və istirahət parkında davam etdirilmişdir.
Bölmənin digər xəbərləri
