MÜAYİNƏLƏR QUŞ QRİPİ XƏSTƏLİYİNİN OLMADIĞINI GÖSTƏRMİŞDİR
Dövlət Baytarlıq Xidmətinin mətbuat mərkəzindən AZƏRTAC-a bildirmişlər ki, quş qripi ilə əlaqədar aprelin 2-dən 7-dək aparılmış monitorinq zamanı götürülmüş nümunələrin müayinəsi aprelin 14-də başa çatmışdır.
Respublika Baytarlıq Laboratoriyasının mütəxəssisləri 37 çöl quşunun patoloji materialını, 1089 ev quşunun qan nümunələrini müayinə etmişlər.
Müayinələrin nəticələri ilə əlaqədar bildirilir ki, nümunələrin heç birində quş qripi xəstəliyinin daşıyıcısına təsadüf edilməmişdir.
Dövlət Baytarlıq Xidməti Ekologiya və Təbii Sərvətlər, Səhiyyə nazirliklərinin, eləcə də Ovçular Cəmiyyətinin mütəxəssis və əməkdaşları ilə birlikdə monitorinqləri davam etdirir. Aprelin 23-də növbəti monitorinqə start veriləcəkdir.
Vətəndaşların nəzərinə çatdırılır ki, ev quşlarını qapalı şəraitdə saxlasınlar, çöl və ya ev quşlarının tələfatı barədə yerli dövlət baytarlıq idarələrinə vaxtında məlumat verməyi unutmasınlar. Bu faktlar barədə “qaynar xətt” vasitəsilə Dövlət Baytarlıq Xidməti nəzdində fəaliyyət göstərən 563-41-57 nömrəli telefona da zəng vurmaq olar.
Qeyd edək ki, köçəri və çöl quşlarının ovlanmasına, satılmasına, onlardan qida məhsulu kimi istifadə edilməsinə qoyulmuş qadağa hələ qüvvədədir.
Bölmənin digər xəbərləri
