Muğanlı-İsmayıllı-Qəbələ yolunda işlərin 70 faizi icra edilib VİDEO
Ağsu, 27 may, AZƏRTAC
Bakı-Şamaxı-Muğanlı-İsmayıllı-Qəbələ avtomobil yolunun Muğanlı-İsmayıllı-Qəbələ hissəsində işlərin 70 faizi icra edilib.
AZƏRTAC-ın bölgə müxbiri xəbər verir ki, ikinci texniki dərəcəyə uyğun qurulan yolun ümumi uzunluğu 85,6 kilometrdir.
Azərbaycan Avtomobil Yolları Dövlət Agentliyinin şöbə rəisi Asim Məmmədlinin sözlərinə görə, Muğanlı-İsmayıllı- Qəbələ avtomobil yolunun əsası ötən əsrin 70-ci illərində qoyulub. Yol sürüşməyə meyilli dağ yamaclarından keçir ki, bu da tez-tez sürüşmə hallarının baş verməsinə səbəb olurdu. Nəticədə yolda avtomobillərin hərəkəti dayanırdı. Yolun yenidən qurulması zamanı bu kimi amillər də nəzərə alınıb və tədbirlər görülür. Yenidənqurma nəticəsində yol 8,8 kilometr qısalacaq.
Yolboyu Ağsuçay çayı üzərində asma körpü də inşa olunur. Körpüdə işlərin 40 faizi yerinə yetirilib. Körpüdən sonra yolun davamı olaraq uzunluğu 885 metr olan tunelin tikintisi aparılır. Ümumilikdə, yeni layihə üzrə yolboyu tunel və biri asma olmaqla 17 körpü layihələndirilib. Avtomobil tunelinin inşası zamanı yaşıllıq zolağına heç bir ziyan vurulmayıb.
Bakıdan şimal-qərb rayonlarına gedən ən qısa magistral yolun yenidən qurulması regionun sosial-iqtisadi inkişafına böyük töhfə verəcək. Bu layihənin turizm, kənd təsərrüfatı və ticarət sahələrinə müsbət təsir edəcəyi gözlənilir. Yeni magistral yol avtomobillərin hərəkət rahatlığını və sürətini artıracaq, sürücülər üçün daha təhlükəsiz olacaq. Bununla yanaşı, yolun müasir tələblərə uyğun yenilənməsi ölkənin nəqliyyat infrastrukturunun inkişafı baxımından da mühüm əhəmiyyət kəsb edir. Layihənin tamamlanması nəticəsində bölgədə iqtisadi əlaqələr möhkəmlənəcək, turizm potensialı artacaq və regiona investisiyaların cəlbi asanlaşacaq.
Ümumiyyətlə, Bakı-Şamaxı-Muğanlı-İsmayıllı-Qəbələ avtomobil yolu əhalinin rahat gediş-gəlişində xüsusi əhəmiyyətə malik olmaqla, paytaxt Bakını İsmayıllı, Qəbələ, Oğuz, Şəki, Qax, Zaqatala və Balakən rayonları ilə birləşdirən ən qısa magistral hesab edilir. Respublikanın mühüm turizm bölgələrinə gedən və ilk dəfə ötən əsrin 70-ci illərində Ulu Öndər Heydər Əliyevin təşəbbüsü ilə salınmış bu yolun yenidən qurulması Prezident İlham Əliyevin tapşırığına əsasən layihələndirilib.
Yolun tikintisi başa çatdıqdan sonra regionda turizm potensialının daha da artacağı proqnozlaşdırılır. İsmayıllı, Qəbələ və Şəki kimi turizm bölgələrinə gedən yolun keyfiyyətinin yaxşılaşdırılması daxili və xarici turist axınının çoxalmasına səbəb olacaq. Turistlərin rahat və təhlükəsiz səyahəti üçün yaradılan bu infrastruktur ölkənin turizm sektorunun inkişafına müsbət təsir göstərəcək.
Qeyd edək ki, Prezident İlham Əliyev mayın 26-da Bakı-Şamaxı-Muğanlı-İsmayıllı-Qəbələ avtomobil yolunun Muğanlı-İsmayıllı-Qəbələ hissəsində görülən işlərlə tanış olub.
Bölmənin digər xəbərləri
