Qızılın qiyməti neftin bahalaşması və inflyasiya təzyiqləri fonunda 4 min dollardan aşağı düşüb
Bakı, 30 oktyabr, AZƏRTAC
Qlobal bazarlarda qızıl ucuzlaşaraq bir troya unsiyası üçün 4 min dollar həddindən aşağı enib. Buna səbəb neft qiymətlərinin artmasının inflyasiya ilə bağlı narahatlıqları gücləndirməsi, eləcə də ABŞ-də açıqlanan yüksək inflyasiya göstəricilərinin Federal Ehtiyat Sisteminin (FED) cari il ərzində yenidən faiz dərəcələrini artıra biləcəyi ilə bağlı gözləntiləri gücləndirməsidir.
AZƏRTAC xəbər verir ki, qızılın bir troya unsiyasının qiyməti hazırda 3990 dollar civarındadır. Beləliklə, qızıl ardıcıl ikinci ayı da ucuzlaşma ilə başa vurmağa hazırlaşır.
Bazarlarda FED-in dekabr ayında faiz dərəcələrini artıracağı ehtimalı təxminən 75 faiz səviyyəsində qiymətləndirilir. Yüksək faiz dərəcələri gəlir gətirməyən qızılın saxlanılmasının alternativ xərclərini artıraraq qiymətli metalın ucuzlaşmasına təzyiq göstərir.
Digər tərəfdən, Səudiyyə Ərəbistanına qarşı hücumların neft təchizatı ilə bağlı narahatlıqları artırması nəticəsində neft qiymətləri ardıcıl 4-cü aylıq artıma doğru irəliləyir. Yaponiyanın paytaxtı Tokioda baza inflyasiyasının oktyabr ayında 2 faizlik hədəfi üstələməsi də qlobal miqyasda qiymət artımı təzyiqləri ilə bağlı narahatlıqları gücləndirib.
Digər qiymətli metalların qiymətlərində də azalma qeydə alınıb. Belə ki, gümüşün bir troya unsiyasının qiyməti 2,1 faiz azalaraq 51,27 dollara, platinin qiyməti 1,9 faiz geriləyərək 1458,85 dollara, palladiumun qiyməti isə 2 faiz ucuzlaşaraq 986,08 dollara enib.
Bölmənin digər xəbərləri
