Yanvarın 29-da Heydər Əliyev Davosdakı Konqres Mərkəzində Beynəlxalq Valyuta Fondu direktorunun birinci müavini Stenli Fişeri qəbul etdi. Cənab Fişer Azərbaycan Prezidentinin gərgin iş cədvəlinə baxmayaraq, vaxt tapıb onu qəbul etməsinə görə minnətdarlığını bildirdi. Heydər Əliyev qeyd etdi ki, Beynəlxalq Valyuta Fondunun (BVF) bir neçə nümayəndə heyəti Bakıda olmuşdur. Onlar BVF-nin tövsiyələrini Azərbaycan Milli Bankına, respublikanın maliyyə mütəxəssislərinə və iqtisadçılarına təqdim etmişlər. Bu tövsiyələr müzakirə edilmişdir və həyata keçirilir.

Heydər Əliyev nəzərə çatdırdı ki, cənab Fişer ilə görüşdən məqsəd mühüm iqtisadi layihələrin maliyyələşdirilməsi yollarını müəyyən etməkdir. O, Azərbaycanda vəziyyət barədə məlumat verdi və Ermənistan-Azərbaycan münaqişəsi üzərində ətraflı dayandı, Prezident bildirdi ki, Azərbaycan böyük tələfata və dağıntılara məruz qaldığına baxmayaraq, münaqişənin dinc vasitələrlə aradan qaldırılmasına tərəfdardır və böyük siyasi saziş bağlanmasına çalışır. Müharibə şəraitinin çətinliklərinə baxmayaraq, respublikada iqtisadi islahatlar aparılır, özəlləşdirmə haqqında qanun qəbul edilmişdir, aqrar bölmədə islahat həyata keçirilməsi nəzərdə tutulur.

Azərbaycan Prezidenti bildirdi ki, respublikanın iqtisadi sahədə strateji yolu bazar iqtisadiyyatına keçməkdən ibarətdir. Lakin Azərbaycan böyük çətinliklərlə qarşılaşmışdır. Müharibə ilə yanaşı Çeçenistan hadisələrinin təsiri də vəziyyəti xeyli çətinləşdirmişdir. İndi respublikamız iqtisadi blokada şəraitindədir. Təbii ki, biz belə çətin şəraitdə BVF-nin köməyinə çox möhtacıq. Fondun ekspertlərinin bütün şərtlərini yerinə yetirməyə çalışacağıq. Dövlət başçısı Beynəlxalq Valyuta Fonduna qarşı bəzi iddialarımız olduğunu da nəzərə çatdırdı. Məsələ burasındadır ki, BVF keçmiş İttifaq respublikalarının hamısına kreditlər ayırmışdır. Lakin biz ondan indiyədək kredit ala bilməmişik. Heydər Əliyev qeyd etdi ki, buna görə də BVF Azərbaycan ilə əməkdaşlığın inkişafı, respublikamızın iqtisadi potensialının möhkəmlənməsi, iqtisadiyyatın yenidən qurulması ilə bağlı məsələlərə xüsusi diqqət yetirməlidir. Azərbaycan Prezidenti dedi ki, xarici ölkələrin aparıcı şirkətləri ilə neft müqaviləsi imzalanması faktının özü Azərbaycanın xarici investisiyalar üçün açıq və dünya təsərrüfat sisteminə qoşulmağa hazır olduğuna sübutdur.

Cənab S.Fişer ətraflı məlumat üçün təşəkkürünü bildirdi və qeyd etdi ki, Azərbaycandakı vəziyyəti diqqətlə izləyir. O dedi: Biz neft müqaviləsinin imzalanmasını razılıq hissi ilə qarşıladıq və onun həyata keçirilməsinə kömək edəcəyik. Bizim köməyimiz Azərbaycan iqtisadiyyatında böyük dəyişikliklər yaradacaqdır. Əminik ki, əməkdaşlığımız sizin iqtisadiyyatı dirçəldib yüksəldəcək, Azərbaycan sənayesini dünya standartlarına yaxınlaşdıracaqdır. Onun da fikrincə, BVF Azərbaycana kredit ayrılması proqramının hazırlanması işini gücləndirməlidir. O bildirdi ki, Bakıdan qayıdan nümayəndə heyəti ilə görüşüb danışmış, Azərbaycan maliyyəçilərinin gördükləri iş haqqında hesabatla tanış olmuş, bu işlərdən razı qalmışdır. BVF direktorunun müavini bildirdi: Əminəm ki, Azərbaycan BVF ekspertlərinin bütün şərtlərini yerinə yetirəcək və ona iri məbləğdə kredit ayrılmasına nail olacaqdır.