MÜNASİBƏTLƏRİN İNKİŞAFI ÜÇÜN SİYASİ DİALOQLA YANAŞI, İQTİSADİ MÜSTƏVİDƏ ƏMƏKDAŞLIĞIN GÜCLƏNDİRİLMƏSİ TƏRƏFLƏRİN MARAQ DAİRƏSİNDƏDİR
AZƏRTAC xəbər verir ki, aprelin 28-də Azərbaycanın xarici işlər naziri Elmar Məmmədyarov ölkəmizdə səfərdə olan Slovakiyanın xarici işlər naziri, Avropa Şurası Nazirlər Komitəsinin sədri Yan Kubişlə görüşmüşdür.
XİN-in mətbuat xidmətindən bildirmişlər ki, ikitərəfli münasibətlərin inkişaf etdirilməsi üçün səylərin artırılmasını, siyasi dialoqla yanaşı, iqtisadi müstəvidə, xüsusilə enerji sahəsində əməkdaşlığın gücləndirilməsini zəruri sayan tərəflər, bu məqsədlə müqavilə-hüquq bazasının təkmilləşdirilməsinin vacibliyini vurğulamış, bunun hər iki dövlətin sahibkarları üçün əlverişli biznes imkanları açacağını və sərmayə qoyuluşuna töhfə verəcəyini qeyd etmişlər.
Bundan əlavə, nazirliklərarası təmasların genişləndirilməsi, qarşılıqlı fəxri konsulluqların və birbaşa aviareysin açılması imkanları, birgə biznes forumun təşkili, parlamentlərarası əlaqələrin qurulması, humanitar sferada tədbirlərin təşkili və digər məsələlər ətrafında fikir mübadiləsi aparılmışdır.
E.Məmmədyarov, həmçinin, bu yaxınlarda BMT Baş Məclisində qəbul olunmuş “Azərbaycanın işğal altında olan ərazilərindəki vəziyyət”lə bağlı qətnaməni xatırlatmış, Slovakiyanın bu məsələdə Azərbaycanın haqlı mövqeyinə dəstəyini yüksək qiymətləndirmişdir.
Görüş zamanı habelə, Avropa Şurasının yüksək rəsmisi kimi slovakiyalı nazirlə bu təşkilatla Azərbaycan arasındakı əməkdaşlıq üzrə cari məsələlərlə bağlı ətraflı müzakirələr aparılmış, qarşılıqlı maraq doğuran digər məsələlər nəzərdən keçirilmişdir.
Bölmənin digər xəbərləri
