Müsbət tendensiyalar fonunda Aİ missiyasının fəaliyyətini davam etdirməsi suallar doğurur - ŞƏRH
Bakı, 13 may, AZƏRTAC
Prezident İlham Əliyevin Qarabağa səfərləri artıq mütəmadi xarakter alıb. Bu səfərlər yerli əhali ilə görüşlərlə yanaşı, həm də tarixi məqamlar və geosiyasi proseslər barədə daxili və xarici auditoriyaya mühüm mesajların verilməsi baxımından strateji əhəmiyyət kəsb edir.
Bu sözləri AZƏRTAC-a açıqlamasında Milli Məclisin deputatı Nurlan Həsənov söyləyib.
O bildirib ki, bu mesajların əsas istiqamətlərindən biri hazırda davam edən sülh prosesidir. Rəsmi Bakı regionda sabitliyin və normallaşmanın tərəfdarı kimi çıxış etsə də, bəzi tərəflər bu prosesə dəstək vermək əvəzinə, müxtəlif əngəllər törətməyə çalışırlar. Azərbaycanın mövqeyi isə qətidir: ölkəmiz qalib dövlət olaraq bölgədə sülhün əsas təşəbbüskarıdır və bu istiqamətdə artıq möhkəm baza formalaşdırıb.
"Həmin bazanın mühüm komponentlərindən biri nəqliyyat və tranzit kommunikasiyalarının bərpasıdır. Azərbaycan Ermənistanla iqtisadi əlaqələrə süni maneələr yaratmayaraq, müəyyən məhsulların ölkə ərazisindən daşınmasına şərait yaradıb. Bu yanaşma Azərbaycanın qalib tərəf kimi nə qədər konstruktiv və sülhməramlı siyasət yürütdüyünün bariz nümunəsidir.
Lakin bu müsbət tendensiyaların fonunda Avropa İttifaqının (Aİ) regiondakı missiyasının fəaliyyətini davam etdirməsi müəyyən suallar doğurur. İki tərəf arasında birbaşa və praktiki addımların atıldığı bir mərhələdə kənar missiyaların rolu birmənalı deyil. Xüsusilə Fransanın regiondakı aktivliyi və Ermənistana verdiyi birtərəfli siyasi dəstək prosesə mənfi təsir göstərir, balanslı yanaşma prinsiplərini zədələyir. Ermənistan daxilindəki revanşist meyillər isə sülh prosesini ləngidən əsas amillərdən biri olaraq qalır.
Mövcud reallıqlar sülh prosesinin birbaşa iki tərəf arasında aparılmasını və üçüncü tərəflərin təsirinin minimuma endirilməsini diktə edir. Keçmiş Minsk qrupunun 30 illik nəticəsiz vasitəçilik təcrübəsi bu yanaşmanın nə qədər aktual olduğunu sübut edir. Bu baxımdan Ermənistan xarici siyasətində sülhə zidd amilləri neytrallaşdırmalı və qərarvermə prosesində müstəqilliyini nümayiş etdirməlidir. Əks halda normallaşma prosesinin davamlılığı risk altına düşə bilər", - deyə N.Həsənov vurğulayıb.
Deputat əlavə edib ki, 2020-ci il Vətən müharibəsində qazanılan Zəfər regionda tamamilə yeni reallıq yaradıb və bu reallıq ölkəmizin strateji yol xəritəsini müəyyən edir. Rəsmi Bakı regional sülhün möhkəmlənməsi üçün təşəbbüskar rolunu qoruyur, həm siyasi, həm də təhlükəsizlik müstəvisində prosesləri diqqətlə izləyir.
Bölmənin digər xəbərləri
