Musiqili Teatrda “Bir nəfəs qədər” tamaşası nümayiş olunacaq
Bakı, 7 noyabr, AZƏRTAC
Noyabrın 8-də Zəfər Günü ilə əlaqədar Azərbaycan Dövlət Akademik Musiqili Teatrında Vətən müharibəsi qəhrəmanlarına, şəhid analarına həsr olunan "Bir nəfəs qədər" tamaşası nümayiş olunacaq.
Teatrdan AZƏRTAC-a bildirilib ki, əsər Samir Qulamovun eyniadlı pyesi əsasında və quruluşunda səhnələşdirilib.
Tamaşada SSRİ Xalq artisti Fikrət Əmirovun musiqilərindən, həmçinin Prezident təqaüdçüsü, gənc pianoçu Kamil Həsənovun fortepiano ifasından istifadə edilib.
İdeya müəllifi və bədii rəhbəri Əməkdar incəsənət xadimi, fəlsəfə doktoru Əliqismət Lalayev olan tamaşanın quruluşçu dirijoru və musiqi tərtibatçısı Əməkdar incəsənət xadimi Fəxrəddin Atayev, quruluşçu rəssamı Vüsal Rəhim, quruluşçu baletmeysteri Əməkdar artist Leyla Ağayeva, konsertmeysteri Kamil Həsənov, rejissor assistentləri Sevinc Məmmədova və Əmrah Dadaşovdur.
“Bir nəfəs qədər”də Əməkdar artist Nahidə Orucova, aktyorlar Gülnarə Abdullayeva, Gülcahan Salamova, Əmrah Dadaşov, İbrahim Əlizadə, Ofeliya Novruzqızı, Əli Kərimov, Murad Əliyev, Prezident mükafatçıları Səmədzadə Xasiyev, Hüseyn Əlili, eyni zamanda balet artistləri İranə Kərimova, Kamran Həsənov və Röya Mehralızadə iştirak ediblər.
Bölmənin digər xəbərləri
