“Muzeyə eksponat hədiyyə et, özün haqqında xatirə saxla” layihəsinin icrasına başlanılıb
Bakı, 29 yanvar, AZƏRTAC
Azərbaycan Milli Elmlər Akademiyasının Milli Azərbaycan Tarixi Muzeyi (MATM) Bakıətrafı qəsəbələrdə ölkəmizin milli-mədəni sərvətlərinin toplanması, qorunması və gələcək nəslə ötürülməsi ilə bağlı maarifləndirici “Muzeyə eksponat hədiyyə et, özün haqqında xatirə saxla” layihəsinin icrasına başlayıb.
Muzeydən AZƏRTAC-a bildiriblər ki, layihə çərçivəsində H.Abbasov аdına Mədəniyyət Evində keçirilən ilk tədbirdə xarici əlaqələr və elmi-kütləvi iş şöbəsinin müdiri Emin Dadaşov muzey və onun zəngin fondlarında mühafizə olunan eksponatlar barədə ətraflı məlumat verib. O, eyni zamanda, vətəndaşlar tərəfindən muzeyə təqdim olunan tarixi əşyaların mədəni sərvətə çevrilməsində və bu nümunələrin gələcək nəsillərə tanıdılması üçün qorunub saxlanılmasında muzeyin rolundan danışıb.
Azərbaycan kinoşünası, Əməkdar incəsənət xadimi Aydın Kazımzadə muzey tərəfindən həyata keçirilən layihənin əhəmiyyətindən bəhs edib.
Sonra muzeyin nəfis nəşrləri olan kataloqlar təqdim edilib. Tədbir iştirakçıları Maştağa qəsəbəsinin sakini Ramiz Əliyevin müxtəlif növlü və ölçülü iki mindən çox saatdan ibarət kolleksiyası ilə tanış olublar.
Bölmənin digər xəbərləri
