NABUKKO LAYİHƏSİNƏ DAİR HÖKUMƏTLƏRARASI MÜQAVİLƏNİN MƏTNİ TƏRƏFDAŞ ÖLKƏLƏRƏ GÖNDƏRİLMİŞDİR
AZƏRTAC-ın xüsusi müxbiri xəbər verir ki, Türkiyənin enerji və təbii ehtiyatlar naziri Hilmi Gülər Ankarada səfərdə olan ABŞ-ın Avrasiya enerji məsələləri üzrə xüsusi elçisi Bayden Qreylə görüşdən sonra bəyan etmişdir ki, Nabukko layihəsində iştirak edən bütün tərəfdaşlara yaxın zamanlarda imzalanacaq müqavilənin mətni göndərilmişdir.
Hilmi Gülər bildirmişdir ki, ABŞ adiministrasiyası, Avropa İttifaqı və Türkiyə hökuməti həmin layihənin tezliklə həyata keçirilməsində maraqlıdırlar. Nazir demişdir ki, amerikalı diplomatla görüşdə Nabukko layihəsi ilə yanaşı, “Şahdəniz” qazı və İraqın enerji ehtiyatları məsələləri də müzakirə olunmuşdur.
Türkiyə Prezidenti Abdullah Gül iyulun 11-də axşam Bayden Qreylə şam yeməyi süfrəsi arxasında söhbət etmişdir. Söhbət zamanı Azərbaycan və Türkmənistan təbii qazının Türkiyə ərazisindən Avropaya nəqli və mavi yanacağın bir hissəsinin Türkiyənin enerji ehtiyaclarının ödənilməsinə ayrılması məsələləri ətrafında fikir mübadiləsi aparılmışdır.
Bölmənin digər xəbərləri
