NARKOTİK MADDƏLƏRİ “ORİJİNAL” ÜSULLA KEÇİRMƏK İSTƏYƏN CİNAYƏTKARLARIN NİYYƏTLƏRİ BAŞ TUTMAMIŞDIR

08.04.2006 [12:10]
Çap et
A⁺ A^-

AZƏRTAC-ın xüsusi müxbiri xəbər verir ki, Parisin Şarl de-Qol hava limanının gömrük xidmətinin əməkdaşları narkotik maddələri “orijinal” üsulla ölkəyə keçirmək istəyən cinayətkarların cəhdlərinin qarşısını almışlar.

Gömrük işçiləri Karakas-Paris-Valensa marşrutu ilə uçan bir ispaniyalı sərnişinin yüklərini yoxlamadan keçirərkən, 3 ədəd gün çətirinin ağırlığı diqqətlərini cəlb etmişdir. Onlar örtüyün ikihissəli olmasından şübhələnmiş, həmin hissələr arasınada çox ustalıqla gizlədilmiş 12,160 kiloqram kokaini aşkar edərək götürmüşlər.

Başqa bir cinayətkarın da “orijinal” üsulu baş tutmamışdır. Əlil arabasındakı nigeriyalı sərnşinin protez ayaqqabılarının forması gömrük işçilərinin nəzərindən yayınmamışdır. Həkimin köməyi ilə bu üzdəniraq əlilin protez ayaqqabıları çıxarılarkən onların içərisində tapılmış narkotik maddə gömrük işçilərinin şübhələrinin əsassız olmadığını sübut etmişdir.

Protez ayaqqabılarda 1,850 kiloqram heroin və 5,730 kiloqram kokain tutulmuşdur. Onların qiymətinin “qara bazar”da 310 min avro olduğu bildirilmişdir.

Hər iki hadisə ilə bağlı cinayət işi açılmışdır.