Naxçıvan Hərbi Hospitalına bayram sovqatı aparılıb
Naxçıvan, 31 dekabr, AZƏRTAC
Dünya Azərbaycanlılarının Həmrəyliyi Günü bütövlük və suverenliyin vacib formulu olan xalq-ordu birliyinin də əsasını təşkil edir. Muxtar respublikada bayram günlərində idarə, müəssisə və təşkilatların kollektivləri, ictimaiyyətin nümayəndələri hərbi hissələrdə əsgər və zabitlərlə görüşür, onlara maddi və mənəvi dəstək olurlar. Ənənə halını alan bayram görüşləri Vətənimizin sadiq keşikçilərinin mənəvi-psixoloji hazırlığına müsbət təsir göstərir, əsgərlərin mübarizlik əzmini daha da artırır.
Dekabrın 31-də Naxçıvan Muxtar Respublikası Ali Məclisinin Sədri Vasif Talıbov Naxçıvan Hərbi Hospitalına gəlib.
Naxçıvan Muxtar Respublikası Ali Məclisinin mətbuat xidmətindən AZƏRTAC-a bildirilib ki, Ali Məclisin Sədri hərbi qulluqçuların səhhəti, müalicəsi, dərman təchizatı və qidalanması ilə maraqlanıb.
Məlumat verilib ki, muxtar respublikada ordu quruculuğu sahəsində görülən işlər nəticəsində şəxsi heyətin xidmət və məişət şəraiti xeyli yaxşılaşıb. Əlahiddə Ümumqoşun Ordusunun hərbi hissələrində şəxsi heyət mütəmadi olaraq tibbi müayinədən keçirilir, xəstəliklərin qarşısı vaxtında alınır. Həmçinin birləşmə və bölmələrdə yerli şəraitə uyğun rejim qaydalarının tətbiq edilməsi əsgərlər arasında xəstəliklərin azalmasına səbəb olub. Hazırda hərbi hospitalda lazımi dərman vasitələri və tibbi ləvazimatlarla təminat müayinə və müalicənin effektiv təşkilinə imkan verir.
Ali Məclisin Sədri hospitalın ayrı-ayrı bölmələrində müalicə olunan hərbi qulluqçuların bayramlarını təbrik edib, onlara tezliklə sağalıb xidmət yerlərinə qayıtmalarını arzulayıb.
Hospitalda müalicə alan əsgərlərə və tibb heyətinə bayram hədiyyələri paylanıb, gətirilən ərzaq məhsulları mətbəxə təhvil verilib.
Sonra Ali Məclisin Sədri Hərbi Hospitalın səyyar tibbi yardım və rentgen flüoqrafiya avtomobillərinə baxıb.
Bildirilib ki, müasir rentgen, USM və kardioqrafiya avadanlıqları ilə təmin olunan səyyar flüoqrafiya maşınları yüksək texniki göstəricilərə malikdir. Bu da birləşmə və bölmələrdə şəxsi heyətin vaxtlı-vaxtında tibbi müayinədən keçirilməsinə imkan verəcək.
Ali Məclisin Sədri Naxçıvan Hərbi Hospitalının həkimləri tərəfindən mütəmadi olaraq Əlahiddə Ümumqoşun Ordusunun birləşmə və bölmələrində müayinələrin aparılması, gigiyenik qaydalara əməl olunması, infeksion xəstəliklərin qarşısının vaxtında alınması və profilaktik tədbirlərin gücləndirilməsi barədə tapşırıqlar verib.
Naxçıvan Muxtar Respublikası Psixi və Ağciyər Xəstəlikləri
dispanserlərinə və Onkoloji Mərkəzə bayram
sovqatı verilib
Azərbaycan Prezidenti İlham Əliyev bu il dekabrın 24-də Dünya Azərbaycanlılarına ünvanladığı müraciətində deyib: “Dünyada yaşayan soydaşlarımızın Vətənə və azərbaycançılıq məfkurəsinə sədaqətini, xalqımızın öz keçmişinə və milli mənəvi dəyərlərinə ehtiramını əks etdirən bu bayram tarixi yaddaşımızın mühüm tərkib hissəsinə çevrilmişdir. Ümummilli lider Heydər Əliyevin misilsiz xidmətləri sayəsində milli birlik və həmrəylik ideyaları daha dolğun məzmun kəsb edərək, real fəaliyyət sahəsi kimi dövlət siyasəti səviyyəsinə yüksəlmişdir”.
Dünya Azərbaycanlılarının Həmrəyliyi Günü və Yeni İl bayramı hər il Naxçıvan Muxtar Respublikasında da özünəməxsus şəkildə qeyd olunur. Ümummilli lider Heydər Əliyevin müəyyənləşdirdiyi həmrəylik və birlik ideyaları real işdə öz əksini tapır, bu günün mahiyyətinə uyğun olaraq xüsusi diqqətə, qayğıya və şəfqətə ehtiyacı olan insanlara baş çəkilir, onlara bayram sovqatları aparılır.
Dekabrın 31-də Naxçıvan Muxtar Respublikası Ali Məclisinin Sədri Vasif Talıbov Psixi Xəstəliklər Dispanserinə gəlib, səhiyyə ocağındakı xəstələri və tibb işçilərini Dünya Azərbaycanlılarının Həmrəyliyi Günü və Yeni İl bayramı münasibətilə təbrik edib, xəstələrin səhhəti, onların müalicəsi və məişət şəraiti ilə maraqlanıb.
Qeyd olunub ki, muxtar respublikada həyata keçirilən səhiyyə islahatları insanlara göstərilən tibbi xidmətin səviyyəsini xeyli yüksəldib. Bu sahəyə ayrılan diqqətin nəticəsidir ki, Psixi Xəstəliklər Dispanserində də xəstələr üçün nümunəvi müalicə və məişət şəraiti yaradılıb, səhiyyə ocağı lazımi dərman preparatları və tibbi avadanlıqlarla təchiz olunub.
Psixi və Ağciyər Xəstəlikləri dispanserlərində və Onkoloji Mərkəzdə müayinə və müalicə zamanı müasir metodların tətbiqinin vacibliyini vurğulayan Ali Məclisin Sədri muxtar respublikada bu kateqoriyadan olan xəstələrin bundan sonra da hərtərəfli qayğı ilə əhatə olunacağını bildirib, psixi, ağciyər və onkoloji xəstəliklərin vaxtında aşkara çıxarılması və qarşısının alınması, bu məqsədlə yerlərdə yoxlamaların aparılması və səhiyyə maarifi işinin təşkili barədə tapşırıqlar verib.
Gətirilmiş hədiyyələr Psixi və Ağciyər Xəstəlikləri dispanserlərində və Onkoloji Mərkəzdə müalicə alan xəstələrə və burada çalışan tibb işçilərinə paylanıb, müxtəlif ərzaq məhsulları anbarlara təhvil verilib.
Bölmənin digər xəbərləri
