Naxçıvan Muxtar Respublikasında infrastruktur layihələri uğurla həyata keçirilir FOTO
Naxçıvan, 19 noyabr, AZƏRTAC
Muxtar respublikada genişmiqyaslı quruculuq işlərinin aparılması, sosial obyektlərin istifadəyə verilməsi, yeni yolların salınması, ümumilikdə, iqtisadi fəaliyyətin bütün sahələrində müasir infrastrukturun yaradılması, əhalinin rahat yaşayışının təmin edilməsinə, məşğulluq səviyyəsinin yüksəldilməsinə əlverişli şərait yaradır.
Naxçıvan Muxtar Respublikası Dövlət Statistika Komitəsinin mətbuat xidmətindən AZƏRTAC-ın Naxçıvan bürosuna bildirilib ki, “Makroiqtisadi göstəricilərin ilbəil artması, abadlıq-quruculuq işlərinin həcminin və miqyasının genişlənməsi, əhali rifahının yaxşılaşması Ulu Öndərimizin yoluna sədaqətin bəhrələridir”, - deyən Ali Məclis Sədrinin müəyyənləşdirdiyi inkişaf strategiyasına uyğun olaraq bu gün də muxtar respublikada infrastruktur layihələrinin həyata keçirilməsi uğurla reallaşdırılır.
Cari ilin yanvar-oktyabr aylarında muxtar respublikada bütün maliyyə mənbələrindən əsas kapitala 885 milyon 386 min manat vəsait yönəldilib ki, bunun da 94,3 faizi tikinti-quraşdırma işlərinin payına düşüb.
Bu ilin ötən dövründə muxtar respublikada infrastruktur quruculuğu tədbirləri çərçivəsində 4 təhsil müəssisəsi, o cümlədən 342 şagird yerlik 1 lisey və 1048 şagird yerlik 2 ümumtəhsil məktəbi, 5 inzibati bina, o cümlədən 2 kənd mərkəzi, 1 nasos stansiyası, 10 subartezian quyusu, 4 körpü, 5 mədəniyyət müəssisəsi, 2 səhiyyə müəssisəsi, 98 istehsal və xidmət sahəsi və bir sıra digər obyektlər tikilib, ümumilikdə, 35 müxtəlif təyinatlı obyekt yenidən qurulub və ya əsaslı təmir olunub.
Bu dövrdə 6 təhsil müəssisəsinin, o cümlədən 2 ümumtəhsil məktəbinin, 15 inzibati binanın, o cümlədən 5 kənd mərkəzinin, 1 nasos stansiyasının, 1 körpünün, 5 mədəniyyət müəssisəsinin, 2 səhiyyə müəssisəsinin, 57 istehsal və xidmət sahəsinin və bir sıra digər obyektlərin tikintisi, 7 təhsil müəssisəsinin, o cümlədən 6 ümumtəhsil məktəbinin, 5 inzibati binanın, o cümlədən 1 kənd mərkəzinin, 4 mədəniyyət müəssisəsinin, 1 səhiyyə müəssisəsinin, 2 idman obyektinin və digər obyektlərin yenidən qurulması və ya əsaslı təmiri davam etdirilib.
Muxtar respublikada vətəndaş məmnunluğunun təmin edilməsi istiqamətində həyata keçirilən tədbirlər çərçivəsində Naxçıvan Muxtar Respublikasının Nazirlər Kabineti yanında “ASAN xidmət” Mərkəzinin və “DOST” Mərkəzinin binalarında tikinti işləri görülür.
Əhalinin rahatlığına və yaşayış səviyyəsinin yüksəlməsinə xidmət edən kommunal-məişət sistemlərinin yaxşılaşdırılması istiqamətində Babək, Kəngərli və Sədərək rayon mərkəzlərində, ətraf qəsəbə və kəndlərdə içməli su təchizatı və kanalizasiya sistemlərinin, Culfa rayonunun Yaycı, Kəngərli rayonunun Qarabağlar, Xok, Yurdçu və Qabıllı, Sədərək rayonunun Dəmirçi kəndlərində içməli su şəbəkələrinin tikintisi uğurla aparılır.
Muxtar respublikada 2 yaşayış binasının tikintisi, 3 yaşayış binasının yenidən qurulması başa çatdırılıb, 3 yaşayış binasının tikintisi, 12 yaşayış binasının yenidən qurulması davam etdirilir. Bundan əlavə, Uzunoba Su Anbarı ətrafında Bağ Evləri yaşayış-istirahət məntəqəsinin tikintisi başa çatdırılıb, hazırda Naxçıvan şəhərində “Gənclər Yaşayış Kompleksi”ndə tikinti işləri görülür.
Alternativ enerji istehsalı sahələrinin yaradılması və enerji infrastrukturunun yenilənməsi məqsədilə cari ilin ötən dövründə Şərur rayonunda 3 meqavat gücündə Günəş Elektrik Stansiyasının tikintisi yekunlaşıb. Ordubad rayonunda Ordubad və Tivi Su Elektrik stansiyalarında tikinti işləri aparılır. Bundan əlavə, 0,3 meqavat gücündə Culfa Külək Elektrik Stansiyasının tikintisi başa çatdırılıb. Ordubad rayonunun Xanağa kəndində 35/10 kilovoltluq elektrik yarımstansiyasında tikinti işləri bitib, Culfa rayonunda 132/110/35/10 kilovoltluq elektrik yarımstansiyasının tikintisi davam etdirilir.
Naxçıvanda yol infrastrukturu davamlı olaraq gücləndirilir. Bu ilin ötən dövründə 31,6 kilometr uzunluğunda avtomobil yolları yenidən qurulub.
Muxtar respublikada səmərəli məşğulluğun təmini əhalinin həyat səviyyəsinin yaxşılaşmasına və fərdi yaşayış evlərinin tikintisinə müsbət təsir göstərib, təkcə 2022-ci ilin yanvar-sentyabr aylarında muxtar respublikada əhalinin şəxsi vəsaiti hesabına, ümumilikdə, 364 min 717 kvadratmetr yaşayış sahəsi istifadəyə verilib.
Müasir infrastruktur obyektlərinin istifadəyə verilməsi muxtar respublikanın şəhər və rayon mərkəzləri ilə yanaşı, ən ucqar dağ kəndlərinin də simasını gözəlləşdirib, əhalinin həyat şəraiti yaxşılaşdırılıb, rahatlığı təmin olunub.
Bütün bunlar muxtar respublikanın uğurlu inkişaf konsepsiyasının və iqtisadi qüdrətinin bariz nümunəsidir.
Bölmənin digər xəbərləri
