Naxçıvan şəhərində yeni xidmət sahəsi fəaliyyətə başlayıb
Naxçıvan, 26 dekabr, AZƏRTAC
Dekabrın 26-da Naxçıvan şəhərində “Nəqşicahan Holdinq Şirkətlər Qrupu” Məhdud Məsuliyyətli Cəmiyyətinin “Görüş yeri” kafesi fəaliyyətə başlayıb.
AZƏRTAC-ın Naxçıvan bürosunun məlumatına görə, bu münasibətlə keçirilən tədbirdə Naxçıvan Muxtar Respublikası Ali Məclisinin deputatı Seymur Talıbov çıxış edərək bildirib ki, Naxçıvan Muxtar Respublikasının hərtərəfli inkişafı onun gündən-günə çiçəklənməsinə, yeni xidmət sahələrinin yaradılmasına imkan verib. Bu gün istifadəyə verilən yeni xidmət sahəsi də muxtar respublikamızda gənclərə göstərilən dövlət qayğısının növbəti ifadəsidir. Ümid edirik ki, yeni xidmət sahəsi gənclərin lazımi istirahətinə, onların asudə vaxtlarının səmərəli keçirmələrinə imkan verəcək.
Naxçıvan Şəhər İcra Hakimiyyətinin başçısı Mirsənani Seyidov qeyd edib ki, muxtar respublikamızda həyata keçirilən quruculuq tədbirləri nəticəsində Naxçıvan şəhəri də gündən-günə gözəlləşir, yeni yollar, yaşayış binaları və xidmət sahələri istifadəyə verilir. Bu gün fəaliyyətə başlayan “Görüş yeri” kafesi də şəhər sakinlərinin və qonaqların asudə vaxtlarının səmərəli təşkilinə imkan yaradacaq.
Yeni xidmət sahəsinin fəaliyyətə başlamasının gəncliyə göstərilən qayğı kimi dəyərləndirən Naxçıvan Muxtar Respublikasının Gənclər Fondunun icraçı direktoru Cəbi Quliyev yaradılmış şəraitə görə minnətdarlıq edib.
Sonra xidmət sahəsinə baxış olub.
Məlumat verilib ki, “Görüş yeri” kafesi zirzəmi ilə birlikdə üç mərtəbədən ibarətdir. Ümumi sahəsi 2457 kvadratmetr olan kompleks 3 fərqli istiqamət üzrə fəaliyyət göstərir. Binanın birinci mərtəbəsində “Bullet” Steak House xüsusi reseptləri əsasında ət və ət məhsullarından müxtəlif təamlar hazırlanır. Menyu üzrə hər bir təamın xammalının öz xüsusi saxlanma üsulu və temperaturu var. Binanın ikinci mərtəbəsində isə əsasən “CHEFM” markası ilə fastfood yeməklər hazırlanır. Bu yeməklərin hazırlanmasında yerli ərzaq məhsullarından istifadə olunur. Markanın məqsədi müasir standartlara cavab verən texnologiyalardan istifadə edərək yüksək keyfiyyətli məhsullarla müştərilərə xidmət göstərmək, yerli məhsulların dadlarını və ənənələrini tanıtmaqdır. Qeyd edək ki, bütün məhsullar müasir standartlara uyğun hazırlanır və istifadə olunan avadanlıqlar dünyanın inkişaf etmiş ölkələrinin standartlarına tam cavab verir.
Üçüncü mərtəbədə yerləşən “Chocha” şokolad evi isə Naxçıvanda yaranmış yerli bir markadır. Şokolad evində isti və sərinləşdirici içkilər, müxtəlif şokoladlar, həmçinin xüsusi qablaşdırılmış müxtəlif müalicəvi otlar, meyvə quruları, çərəzlər təqdim edilir. Şokolad evində “Chocha” adı altında hazırlanmış xüsusi hədiyyəlik paketlər də əldə etmək olar. Eyni zamanda, burada Naxçıvan Muxtar Respublikası Ali Məclisi Sədrinin müvafiq sərəncamına əsasən oxunması zəruri olan kitablardan ibarət kitabxana da yaradılıb.
Yeni yaradılan xidmət sahəsində 30-a yaxın yeni iş yeri açılıb.
Bölmənin digər xəbərləri
