Nazir müavini: Azərbaycanın iqlim təşəbbüsləri qlobal miqyasda yaşıl iqtisadiyyata keçiddə əhəmiyyət daşıyacaq
Bakı, 6 noyabr, AZƏRTAC
Azərbaycan bankları iqtisadi amillərlə yanaşı, ekoloji məsələlərə də diqqət yetirməlidir.
AZƏRTAC xəbər verir ki, bu barədə Biznes Mühiti və Beynəlxalq Reytinqlər üzrə Komissiyanın və Kiçik və Orta Biznesin İnkişafı Agentliyinin (KOBİA) təşkilatçılığı, ABB və “Azercell Telecom” MMC-nin dəstəyi ilə ekoloji, sosial və korporativ idarəetmə (ESG) üzrə vahid platformanın və milli standartın təqdimatı ilə bağlı konfransda ekologiya və təbii sərvətlər nazirinin müavini Vüqar Kərimov bildirib.
Nazir müavini qeyd edib ki, artıq maliyyə vəsaitlərinin ayrılması zamanı ekoloji göstəricilərə nəzər yetirmək zəruri hala çevrilib.
“Bu istiqamətdə addımlar, həyata keçirilən tədbirlər karbon emissiyalarını azaltmaqla yanaşı, həm də Azərbaycanın iqtisadi dayanıqlığını gücləndirəcək. Bakıda keçiriləcək BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) bu sahədə vacib rol oynayacaq. Azərbaycanın iqlim təşəbbüsləri təkcə milli səviyyədə deyil, həm də qlobal miqyasda yaşıl iqtisadiyyata keçiddə mühüm əhəmiyyət daşıyacaq”, - deyə nazir müavini əlavə edib.
Bölmənin digər xəbərləri
