Nazir: Qarşıdakı illərdə "Sağlam məhəllə" layihəsinin miqyasının genişləndirilməsi nəzərdə tutulur VİDEO
Naxçıvan, 6 fevral, N.Əsgərov, AZƏRTAC
Prezident İlham Əliyevin Sərəncamına əsasən Azərbaycanın şəhər və rayonlarında “Sağlam məhəllə” layihəsinin icrasına başlanılıb. Layihənin ilk mərhələsi bu ay Naxçıvan Muxtar Respublikasında start götürüb. Hazırda layihə Naxçıvanın üç müxtəlif rayonunda – Şahbuz, Culfa və Babək rayonlarında həyata keçirilir və artıq açılış mərasimləri təşkil olunub.
Bu sözləri AZƏRTAC-ın bölgə müxbirinə müsahibəsində Azərbaycan Respublikasının gənclər və idman naziri Fərid Qayıbov bildirib.
Nazir deyib: “Sevindirici haldır ki, uşaqlar bu layihəyə böyük maraq göstərir və idman meydançalarından fəal şəkildə istifadə edirlər. Layihənin icrasında bizə dəstək olan idmançılara və müxtəlif idman növlərinin nümayəndələrinə xüsusi təşəkkürümü bildirirəm. Bu, əsasən idmanın kütləviliyinə yönəlmiş layihədir. Təbii ki, əhalinin, xüsusilə də uşaqların bu təşəbbüsə böyük sevinc və maraqla yanaşdığını müşahidə edirik. Uşaqlar asudə vaxtlarını sağlam və faydalı şəkildə keçirmək üçün belə məhəllə idman məkanlarından istifadə edirlər".
“Qarşıdakı illərdə layihənin miqyasının genişləndirilməsi nəzərdə tutulur. Qeyd etdiyim kimi, bu cür layihələr gələcəkdə Azərbaycanın digər bölgələrində də həyata keçiriləcək. İlk mərhələ Naxçıvanda başlayıb və bu il ərzində başqa rayonları da əhatə edəcək", - deyə Fərid Qayıbov əlavə edib.
Bölmənin digər xəbərləri
