Sabitliyi təmin etməyi bacarmaq sülhpərvərliyin ən yüksək formasıdır - Ekspert rəyi
Bakı, 6 fevral, AZƏRTAC
Təcrübə göstərir ki, sülh anlayışı çox zaman siyasi ritorikanın bir elementi kimi istifadə olunur. Hətta açıq şəkildə münaqişə aparan tərəflər belə, beynəlxalq auditoriya qarşısında özlərini “sülh tərəfdarı” kimi təqdim etməyə çalışırlar. Son 30 il ərzində Ermənistanın hərbi-siyasi rəhbərliyinin davranışı bu baxımdan tipik nümunədir: rəsmi bəyanatlarda sülhdən danışılırdı, faktiki addımlar isə işğalın möhkəmləndirilməsinə yönəlirdi. Bu ziddiyyətli yanaşma təkcə regional münaqişələr üçün deyil, qlobal proseslər üçün də xarakterikdir.
Bu sözləri AZƏRTAC-a açıqlamasında Mətbuat Şurası İdarə Heyətinin üzvü, media eksperti Müşfiq Ələsgərli söyləyib.
Ekspert bildirib ki, müasir dünyada sülh ideyası hamı tərəfindən qəbul edilsə də, geosiyasi rəqabət, enerji və təhlükəsizlik maraqları müharibələri daha da dərinləşdirir. Belə şəraitdə sülhü real siyasi nəticəyə çevirmək liderlik, strateji baxış və siyasi iradə tələb edir. Prezident İlham Əliyevin digər liderlərdən üstünlüyü budur ki, o, sülhü ritorikada deyil, reallıqda təmin etməyi bacardı.
“Azərbaycan Prezidenti İlham Əliyevə “Zayed İnsan Qardaşlığı Mükafatı”nın təqdim edilməsi təsadüfi hal deyil. Bu mükafat fərqli mədəniyyətlər, dinlər və xalqlar arasında real anlaşma qurulmasına töhfə verən liderlər üçün nəzərdə tutulub. Prezident İlham Əliyevin digər liderlərdən əsas üstünlüyü də məhz burada üzə çıxır. O, sülhü abstrakt çağırış kimi deyil, konkret nəticə kimi təqdim etdi. Güc üstünlüyünü sülh üçün real təminat mexanizminə çevirdi. Azərbaycanın ərazi bütövlüyünün bərpasından sonra revanşizm yolunu seçmədi, əksinə regionda yeni təhlükəsizlik arxitekturası və əməkdaşlıq modeli təklif etdi. Bu yanaşma beynəlxalq hüququn əsas prinsiplərinə - suverenlik, ərazi bütövlüyü və dövlətlərin bərabər hüquqlu olmasına söykənir”, - deyə M.Ələsgərli vurğulayıb.
Onun sözlərinə görə, Prezident İlham Əliyevin yüksək sülhpərvərliyinin və sülhyaratma bacarığının nəticəsidir ki, indi təkcə Azərbaycanda deyil, bütövlükdə Cənubi Qafqazda sülh bərqərar olur. Bu mükafatın ölkəmiz üçün yüksək faydası var. O, beynəlxalq sistemdə Azərbaycanın regional sülhün qarantı imicini legitimləşdirdi. Prezident İlham Əliyev beynəlxalq aləmə sübut etdi ki, sülh yalnız kompromislərdən deyil, ədalətli mövqedən və məsuliyyətli gücdən doğur. Bu yanaşma müasir dünyada sülhün mümkünlüyünə dair mühüm presedent yaradır və yeni beynəlxalq siyasi düşüncə üçün ciddi əsas formalaşdırır.
Bölmənin digər xəbərləri
