Azərbaycan enerji ixracatçısından çoxfunksiyalı bağlantı mərkəzinə çevrilir - ŞƏRH
Bakı, 30 sentyabr, AZƏRTAC
Bakıda keçirilən II Azərbaycan Beynəlxalq İnvestisiya Forumu çərçivəsində Prezident İlham Əliyevin iştirakı ilə keçirilən “Parçalanmış dünyada etimadın bərpası: Cənubi Qafqaz qlobal bağlantı və investisiya sabitliyinin dayağı kimi” mövzusunda müzakirə, əslində, yalnız investisiya imkanlarının təqdimatı deyildi. Çıxışda Azərbaycanın qarşıdakı illər üçün iqtisadi inkişaf modeli, enerji və nəqliyyat siyasəti, rəqəmsal transformasiya, ərzaq təhlükəsizliyi və Cənubi Qafqazın yeni geoiqtisadi reallıqlardakı rolu barədə mühüm mesajlar səsləndirildi.
Bu fikirləri AZƏRTAC-a açıqlamasında Milli Məclisin deputatı Anatoli Rafailov deyib.
Onun sözlərinə görə, müasir dünyada demək olar ki, “etimad” yeni iqtisadi reallığın əsas kapitalıdır. Forumun mövzusunun özündə “etimad” anlayışının önə çıxarılması təsadüfi deyil. Qlobal iqtisadiyyatda geosiyasi qarşıdurmalar, təchizat zəncirlərinin dəyişməsi və nəqliyyat marşrutlarının yenidən formalaşması investorlar üçün yalnız gəlirlilik deyil, sabitlik və proqnozlaşdırıla biləcək məsələsini də əsas meyara çevirib. Prezident İlham Əliyev də Azərbaycanın əsas üstünlüklərindən biri kimi siyasi və iqtisadi sabitliyi, proqnozlaşdırılan vergi sistemini və investisiya mühitini qeyd edib. Onun sözlərinə görə, Azərbaycan son 20 ildə 350 milyard dollardan çox investisiya cəlb edib. Bu baxımdan Bakıda keçirilən Forumun əsas mesajlarından biri belə ifadə oluna bilər: qeyri-müəyyənliyin artdığı dünyada sabit və etibarlı tərəfdaşlıq mühiti özü mühüm iqtisadi resursa çevrilir.
“Son illər Azərbaycanın rolu da dəyişir və respublikamız enerji ixracatçısından çoxfunksiyalı bağlantı mərkəzinə çevrilir. Prezident İlham Əliyevin çıxışında diqqət çəkən məqamlardan biri Azərbaycanın yalnız neft-qaz ölkəsi kimi deyil, enerji, logistika, rəqəmsal infrastruktur və regional bağlantıların kəsişmə nöqtəsi kimi təqdim edilməsidir. Azərbaycan çox uğurlu coğrafi mövqeyə malikdir və bu strategiyanın mühüm elementidir. Lakin coğrafiyanın özü kifayət etmir və Prezidentin vurğuladığı kimi, bunun üçün dəmir yolları, avtomobil yolları, limanlar, hava limanları və digər infrastruktur yaradılmalıdır. Azərbaycan bu istiqamətdə son illərdə genişmiqyaslı investisiyalar həyata keçirib və bütün qonşularla nəqliyyat əlaqələrinin formalaşdırılmasına diqqət yetirib. Bu sırada Orta Dəhliz xüsusi əhəmiyyət qazanır, qlobal təchizat zəncirlərinin dəyişdiyi bir şəraitdə alternativ marşrutların əhəmiyyəti artır. Azərbaycan isə Xəzər üzərindən Mərkəzi Asiya ilə Cənubi Qafqazı, oradan isə Avropa bazarlarını birləşdirən logistika sistemində öz mövqeyini möhkəmləndirməyə çalışır”, - deyə deputat əlavə edib.
Enerji siyasəti paralel olaraq iki istiqamətdə inkişaf etdirilir
A.Rafailov bildirib ki, Prezident İlham Əliyevin çıxışında Azərbaycanın enerji siyasətinin paralel olaraq iki istiqamətdə inkişaf etdirildiyi diqqətə çatdırılıb. Neft-qaz sektoru uzun müddət iqtisadiyyatın əsas sahələrindən biri olaraq qalacaq, eyni zamanda, bərpaolunan enerji, elektrik enerjisi ixracı və rəqəmsal infrastruktur genişləndiriləcək. Ümumilikdə, iqtisadi şaxələndirmə neft-qazdan imtina deyil, bu sektordan əldə olunan gəlirlərin mədənçilik, metallurgiya, aqrobiznes, rəqəmsal iqtisadiyyat, logistika, bərpaolunan enerji və sənaye istehsalı kimi sahələrin inkişafına yönəldilməsi kimi təqdim olunur.
“Forumun praktiki nəticəsi də diqqətəlayiqdir. Çünki bu mesajların yalnız siyasi və iqtisadi bəyanat səviyyəsində qalmadığını Forum çərçivəsində imzalanan sənədlər də göstərir. İqtisadiyyat Nazirliyinin məlumatına görə, II Azərbaycan Beynəlxalq İnvestisiya Forumu çərçivəsində 23 sənəd üzrə ümumi dəyəri 10,8 milyard ABŞ dolları olan investisiya layihələrinin reallaşdırılması nəzərdə tutulur. Layihələr süni intellekt, enerji, bərpaolunan enerji, rəqəmsal iqtisadiyyat, sənaye, kənd təsərrüfatı, maliyyə, su təsərrüfatı və digər sahələri əhatə edir. Bu fakt Forumun mahiyyətini daha aydın göstərir: məqsəd sadəcə Azərbaycana kapital cəlb etmək deyil, kapitalı texnologiya, yeni istehsal, regional dəyər zəncirləri və insan kapitalı ilə birləşdirməkdir.
Bu mənada “Parçalanmış dünyada etimadın bərpası” mövzusu Azərbaycanın özünü yalnız investisiya qəbul edən ölkə kimi deyil, Avropa ilə Asiya, enerji ilə rəqəmsal iqtisadiyyat, ənənəvi və yeni enerji mənbələri, regional ticarət və qlobal kapital arasında bağlantı yaradan platforma kimi təqdim etmək istəyini əks etdirir”, - deyə o vurğulayıb.
Bölmənin digər xəbərləri
