Emil Əfrasiyab: Qara Qarayev bütöv bir dövrün simasıdır
Bakı, 6 fevral, Günel Alıyeva, foto Səfiyar Məcnun, AZƏRTAC
Dahi bəstəkar Qara Qarayevdən danışarkən onun Azərbaycan mədəniyyəti və musiqi xəzinəsində tutduğu misilsiz yeri xüsusi vurğulamaq lazımdır. Qara Qarayev bütöv bir dövrün simasıdır. O, yüksək peşəkar məktəb keçmiş sənətkar olmaqla yanaşı, dahi Dmitri Şostakoviçin də tələbəsi olub.
Bu fikirləri AZƏRTAC-a açıqlamasında pianoçu, Əməkdar artist Emil Əfrasiyab bildirib.
Onun sözlərinə görə, Azərbaycan musiqisi o qədər zəngin və dərin bir dünyadır ki, bu irsi peşəkar səviyyədə mənimsəmək, milli üslubda formalaşmaq hər zaman çətin və məsuliyyətli bir proses olub.
“Mənim musiqi dünyagörüşümün formalaşmasında xüsusi rolu olan iki böyük bəstəkar var: birincisi Üzeyir Hacıbəyli, ikincisi isə Qara Qarayev. Qara Qarayevin yaradıcılığı artıq hər şeyi özü “danışır”. O, janr fərqi qoymadan elə bir üslubda musiqi yazıb ki, həmin üslubu müasir janrlarla — cazla, modern istiqamətlərlə, eləcə də klassik ənənə ilə rahat şəkildə sintez etmək mümkündür. Yəni o, müxtəlif musiqi dünyaları arasında körpü qurmağı bacaran sənətkar idi”, – deyə Emil Əfrasiyab əlavə edib.
Pianoçunun fikrincə, gənc musiqiçilər üçün ən vacib məqamlardan biri Qara Qarayevin musiqisini və onun yaratdığı mədəni-estetik məktəbi əvvəlcə dərindən dinləmək, dərk etmək, daha sonra həmin təcrübənin üzərində öz yaradıcılıq axtarışlarını qurmaqdır. O vurğulayıb ki, bu yanaşma gənclərin peşəkar formalaşmasında mühüm rol oynayır.
Sonda Emil Əfrasiyab qeyd edib ki, Üzeyir Hacıbəyli və Qara Qarayev kimi dahilərimizin irsinin yaşadılması yalnız təbliğat və layiqli təqdimat yolu ilə mümkündür. Bu irsi həm ölkə daxilində, həm də ölkə xaricində konseptual şəkildə, yüksək səviyyədə tanıtmaq və təmsil etmək hər birimizin mənəvi vətəndaşlıq borcudur.
Bölmənin digər xəbərləri
